Avtomobıl joldaryn buzatyn júk kólikterine qandaı shara qoldanylady
NUR-SULTAN. QazAqparat - Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine kólik máseleleri boıynsha ózgerister men tolyqtyrýlar engizý týraly» zań jobasy eki oqylymda qaralyp, qabyldandy, dep habarlaıdy QazAqparat tilshisi.
Zań jobasynyń negizgi maqsattary: joldarda kólik baqylaýyn avtomattandyrý; jolaýshylardy jáne bagajdy tasymaldaý sapasyn arttyrý; temirjol jáne teńiz kóligine tekserý júrgizý tártibin jetildirý; kólik quraldaryn qaýipsiz paıdalanýdy arttyrý; azamattyq avıatsııany memlekettik retteýdiń tıimdiligin jaqsartý; bıýdjettik áýe kompanııany jáne ulttyq áýe júk tasymaldaýshysyn qurý, sondaı-aq basymdyqqa ıe halyqaralyq áýe baǵdarlaryn damytý.
«Avtomobıl kóligi salasyna toqtalsaq, kólik quraldaryn tekserý negizderiniń naqty tizbesin aıqyndaý arqyly joldardaǵy baqylaý tártibin ózgertý usynylady. Bul kólik quralyn toqtatpaı-aq ruqsat berý qujattarynyń bar nemese joqtyǵyn tekserýge, kólikti baqylaý organdarynyń kólik quraldaryn jappaı toqtatý tájirıbesinen bas tartýǵa múmkindik beredi», - dedi Indýstrııa jáne ınfraqurylymdyq damý mınıstri Roman Sklıar.
Onyń sózine qaraǵanda, zań jobasynda qazaqstandyq tasymaldaýshylarǵa shekaraǵa jaqyn bir oblystyń aýmaǵynda ornalasqan eldi mekender arasynda tasymaldaýdy júzege asyrýǵa ruqsat berý usynylady. Bul túzetýdi qabyldaý 126 halyqaralyq marshrýt boıynsha qosymsha shekaralas oblystardaǵy 300-deı eldi mekenniń jolaýshylaryn turaqty tasymaldaýǵa jol ashady.
«Búgingi tańda jolaýshylardy taksımen tasymaldaıtyndar úshin klıentterdiń tapsyrystaryn retteıtin ınternet-resýrstar barshylyq. Osyǵan baılanysty, zań jobasynda kórsetilgen onlaın-servısterdiń qyzmetin zańnamalyq deńgeıde retteý usynylady. Ol mobıldi qosymshalardy turaqty paıdalanatyn zańsyz tasymaldaýshylardy kóleńkeden shyǵarýǵa yqpal etedi», - dedi mınıstr.
Budan bólek, tehnıkalyq baıqaýdan ótý týraly jalǵan dıagnostıkalyq kartalardy berý faktilerin boldyrmaý maqsatynda kólik salasyndaǵy ýákiletti organnyń mamandandyrylǵan tehnıkalyq baıqaý baǵdarlamalaryna qoıylatyn talaptardy bekitý jónindegi quzyretin engizý usynylady.
«Avtomobıl joldarynyń saqtalýyn qamtamasyz etý úshin bólinbeıtin jáne suıyq júkterdi tasymaldaýdy qospaǵanda, gabarıttik jáne ostik júktemeler boıynsha tıisti normadan asyp ketken júgi bar iri kólemdi jáne aýyr salmaqty avtokólik quraldarynyń júrip ótýine tyıym salý usynylady», - dedi Roman Sklıar.
