Avtomobıl shyǵaryndylaryn ólsheıtin qurylǵy Almatyda bıyl nelikten qoldanylmaıdy
ALMATY. KAZINFORM – Pılottyq kezeńde jumys istegen spektrometrler byltyr 17 myńnan astam kóliktiń shyǵaryndylaryn ólshegen.
Byltyr Sergek Group kompanııalar tobynyń jeke bastamasy retinde Tólebaev jáne Gogol kósheleriniń qıylysynda spektrometrler ornatylǵanyn jazǵanbyz.
Jobanyń maqsaty – avtokólikterdiń shyǵaryndylaryndaǵy zııandy zattardy anyqtaý múmkindigin zertteý bolǵan.
Almaty qalasynyń Ekologııa basqarmasy agenttik saýalyna jaýap bere otyryp, 2025 jyly spektrometrdi ornatý josparda joq ekenin habarlady. Sonymen qatar basqarma pılottyq jobanyń nátıjelerimen bólispedi.
Al Sergek Group kompanııalar tobynyń kommýnıkatsııa departamentinde bul qurylǵy ári qaraı damytýdy qajet etetinin málimdedi.
- Qurylǵy «Sergek» ıntellektýaldy júıesimen biriktirildi. 15 qazan men 8 qarasha aralyǵynda júrgizilgen pılot barysynda 17 myńnan astam kóliktiń shyǵaryndylary ólshendi. Degenmen, alynǵan derekterden zııandy zattardyń shekti mólsherden asyp ketýin naqty anyqtaý múmkin bolmady, sebebi ólsheý nátıjelerine jel, ylǵaldylyq, atmosferalyq qysym sııaqty syrtqy faktorlar áser etti. Bul tehnologııany ári qaraı damytý úshin qosymsha zertteýler júrgizip, syrtqy faktorlardy eskere otyryp túzetý koeffıtsıentterin engizý, ólsheý ádistemesin qalyptastyryp, ony QR reestrine engizý qajet, - delingen kompanııa jaýabynda.
Alaıda jaýapty kompanııa bul jobadan túbegeıli bas tartpaǵanyn da málim etti. Sergek Group málimetinshe, joba tek ınvestıtsııalardy qajet etedi.
- Pılottyq joba spektrometrlerdiń kómegimen avtokólik shyǵaryndylaryn avtomatty túrde ólsheý júıesin damytýǵa jaqsy múmkindik bar ekenin kórsetti. Alaıda, ony tolyqqandy engizý úshin qosymsha ınvestıtsııalar qajet. Eger ýákiletti organdar bul júıege qyzyǵýshylyq tanytsa, ol avtomatty túrde jumys istep, qozǵalmaly lastaý kózderin anyqtaýǵa, sondaı-aq júrgizýshilerge tehnıkalyq qyzmet kórsetýden ótý nemese ekologııalyq baqylaý beketterine barý qajettigi týraly habarlama jiberýge múmkindik beredi, - dep habarlady mekemeden.
Aıta keteıik, spektrometrler jumysynyń nátıjesinde eshqandaı kólikke aıyppul salynbaǵan. Sebebi túrli tehnologııalardy testileýdiń zertteý kezeńderi aıyppul sanktsııalaryn kózdemeıdi.
Degenmen, 2024 jyly Almatyda ekologııalyq normalardy buzǵan júrgizýshilerge 437 mln teńge aıyppul salyndy.
Almaty polıtsııasynyń málimetine sáıkes, qalada 19 tabıǵatty qorǵaý beketi bar. Olar qalanyń jan-jaǵynda ornalastyrylǵan. 2024 jyly tabıǵatty qorǵaý beketterinde 25 myńnan quqyq buzýshylyq anyqtalǵan. Shyǵaryndylardaǵy lastaýshy zattardyń mólsheri boıynsha normatıvterden asatyn avtokólikterdi jáne basqa da jyljymaly kólik quraldaryn paıdalanǵany úshin (QR ÁQbK-niń 334-babynyń 1-bóligi boıynsha) 25 myńnan astam ákimshilik hattamalar toltyrylǵan.
Eske salaıyq, buǵan deıin Almatyda aýa sapasyn lastaıtyn basty faktorlar qandaı ekenin jazǵanbyz.