Avtomobıl men traktorlarǵa arnalǵan bólshekterdiń ımporty 50 paıyzǵa ósti - senator

ASTANA. KAZINFORM – Elden negizgi shıkizat eksporttalyp, Qazaqstanǵa qosylǵan quny bar taýarlar ımporttalady. Bul týraly Senatta ótip jatqan óńdeý ónerkásibin damytý taqyrybyndaǵy Parlamenttik tyńdaýda depýtat Saǵyndyq Luqpanov aıtty.

«Óńdeý ónerkásibine shıkizat pen bólshekter ımportynyń kólemi 50 paıyzdan asyp otyr. Elden negizgi shıkizat eksporttalyp, Qazaqstanǵa qosylǵan quny bar taýarlar ımporttalady. Qazaqstan elde óndiriletin alıýmınııdiń 87 paıyzyn, mystyń 99 paıyzyn, qorǵasynnyń 77 paıyzyn óńdelmegen nemese bastapqy óńdelgen kúıde eksporttaıdy. Bul rette, otandyq óńdeýshi kásiporyndar óndiriske qajet shıkizat tapshylyǵyn sezinip otyr», - dedi S. Luqpanov.

Sonymen qatar senator statıstıkalyq málimetterdi jarııalady.

«El ımportynyń 40 paıyzy mashına jasaý ónimderine tıesili. Byltyr avtomobılder men traktorlarǵa arnalǵan bólshekterdiń ımporty 50 paıyzǵa jýyq (1,1 mlrd dollardy qurady), avtomobıl kýzovtarynyń ımporty 51,3 paıyzǵa (jalpy somasy 1,6 mlrd dollarǵa shanaq ákelindi) ósti. Munymen qosa, aýyl sharýashylyǵynda egin jınaýǵa arnalǵan mashınalar men mehanızmderdiń ımporty 2,5 esege artty. Atap aıtqanda, Qazaqstandaǵy mashına jasaýdyń ishki naryǵy otandyq óndirispen nebári 13 paıyzǵa qamtamasyz etilgen», - dedi depýtat.

Saǵyndyq Luqpanovtyń sózine qaraǵanda, mashına jasaýdaǵy negizgi úlesti lokalızatsııanyń mınımaldy deńgeıimen qarapaıym qurastyrý óndirisi alyp otyr.