Avtomobıl kóligi jáne kóliktik baqylaý komıtetiniń tóraǵasy aýysty
ASTANA. KAZINFORM — Dastan Jumaqulov QR KM Avtomobıl kóligi jáne kóliktik baqylaý komıtetiniń tóraǵasy bolyp taǵaıyndaldy, dep habarlaıdy Kólik mınıstrliginiń baspasóz qyzmeti.
Qazaqstan Respýblıkasy kólik mınıstriniń buıryǵymen Dastan Rahymjanuly Jumaqulov Avtomobıl kóligi jáne kóliktik baqylaý komıtetiniń tóraǵasy laýazymyna taǵaıyndaldy.
1987 jyly Shyǵys Qazaqstan oblysynda dúnıege kelgen. Akademık E.A. Bóketov atyndaǵy Qaraǵandy memlekettik ýnıversıtetin, sondaı-aq L.B. Goncharov atyndaǵy Qazaq avtomobıl-jol ınstıtýtyn támamdaǵan.
2008–2013 jyldary kóliktik baqylaý salasynda qyzmet etip, Astana qalasy jáne Qaraǵandy oblysy boıynsha «Saryarqa» óńiraralyq kóliktik baqylaý ınspektsııasynda zańger, ótinishterdi qabyldaý jónindegi nusqaýshy, jetekshi maman, quqyq jáne kadr jumysy bóliminiń basshysy laýazymdaryn atqardy.
2013–2023 jyldary kóliktik baqylaý júıesinde eńbek etip, Qaraǵandy oblysy boıynsha Kóliktik baqylaý ınspektsııasynda bólimderdiń basshysynan ınspektsııa basshysynyń orynbasaryna deıingi qyzmette boldy.
2023 jyldyń jeltoqsanynan bastap qazirgi ýaqytqa deıin Taldyqorǵan qalasynda QR KM Avtomobıl kóligi jáne kóliktik baqylaý komıtetiniń Jetisý oblysy boıynsha Kóliktik baqylaý ınspektsııasynyń basshysy qyzmetin atqardy.
Budan buryn Damır Qojahmetov QR kólik vıtse-mınıstri bolyp taǵaıyndalǵanyn jazdyq.
