Avtomobılge jeńildetilgen nesıe alǵandardyń tizimi ashyq jarııalanýy múmkin

ASTANA. QazAqparat – Jeńildetilgen nesıemen avtomobıl alǵan qazaqstandyqtardyń aty-jóni jarııalanýy múmkin, dep habarlaıdy QazAqparat tilshisi.

Úkimet otyrysynan keıin BAQ ókilderi Indýstrııa jáne ınfraqurylymdyq damý mınıstri Marat Qarabaevqa «Avtomobılge jeńildetilgen nesıe alǵan otandastarymyzdyń tizimine qol jetkizý múmkindigi bar ma?» degen saýal qoıdy. Mınıstr suraqty «Ónerkásipti damytý qory» AQ basqarma tóraǵasynyń orynbasary Rınat Gapparovqa aýdardy.

«Máseleni baǵdarlamaǵa qatysýshylardyń aldynda kóterip, qarastyramyz», - dedi ol.

Mınıstr M. Qarabaevtyń málimdeýinshe, avtomobıl nesıesiniń saıty jetildirile túsedi.

«Jalpy, atalǵan baǵdarlama ashyq júzege asyrylady. Adamı faktorǵa jol berilmeıdi. Baǵdarlama jumysyn jetildire túsýge arnalǵan usynystardy qaraýǵa ázirmiz», - deıdi vedomstvo basshysy.

Buǵan deıin avtomobılge jeńildetilgen nesıege ótinimdi smartfon arqyly berý múmkindigi týraly aıtylǵan edi.

Sondaı-aq, Qarjy mınıstri Erulan Jamaýbaev suranystyń artýyna baılanysty qosymsha qarjy bólý máselesi týraly saýalǵa jaýap berdi.