Avtomektepterge jańa talap qoıylmaq – Májilis
ASTANA. KAZINFORM – Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine jol qaýipsizdigin tsıfrlandyrý jáne júrgizýshilerdi daıarlaý salasyndaǵy kásipkerlik qyzmet máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
- Búgin qoǵamda qaýipsizdikke degen turaqty suranys bar.
Jolda da aýlada da tsıfrlyq ortada da ár adam ózin qaýipsiz sezingisi keledi. Zań jobasy jol qozǵalysy qaýipsizdigin arttyrýǵa baǵyttalǵan.
Ol úshin júrgizýshilerdi daıarlaý júıesin jetildirý, salaǵa zamanaýı tsıfrlyq quraldardy engizý jáne tsıfrlyq ortada adamnyń qaýipsizdigin kúsheıtý kózdelip otyr. Osyǵan baılanysty jol qozǵalysy erejelerin buzýdy tirkeıtin tehnıkalyq quraldardy paıdalaný tártibi naqtylanady. Munymen qosa, zań jobasynda avtomektepterdiń qyzmetine memlekettik baqylaýdy kúsheıtý usynylady. Atap aıtqanda avtomektepterdiń qyzmetine ruqsat berý tártibi engiziledi. Ol úshin «Ruqsattar jáne habarlamalar týraly» zańǵa ózgerister engizilmek, - dedi Májilis depýtaty Ekaterına Smyshlıaeva.
Ruqsat alý úshin avtomektepte:
- qajetti materıaldyq-tehnıkalyq baza;
- oqý alańdary;
- oqytýǵa arnalǵan kólikter jáne bilikti oqytýshylar bolýy tıis.
Sonymen qatar ruqsat alǵan oqý uıymdarynyń memlekettik tizilimin qurý eskerilgen. Bul tizilim ruqsat alǵannan keıin oqý uıymdarynyń qyzmetin baqylaýǵa múmkindik beredi. Tizilimdi júrgizý Іshki ister mınıstrligine júkteledi. Medıtsınalyq málimetterdiń keıbir túrlerin Іshki ister mınıstrliginiń derekter bazasyna engizý qarastyrylǵan.
Jeke derekterdi qorǵaý
- Zań jobasynda jeke derekterdi qorǵaý jáne kıberqaýipsizdik máselelerine qatysty jeke normalar kózdelgen. Aıta ketý kerek bul ózgerister azamattardyń jeke derekterin qorǵaý týraly konstıtýtsııalyq normany iske asyrý maqsatynda engizilip otyr. Birinshiden, zań jobasynda jeke derekter operatorlaryn sanattarǵa bólý engiziledi. Operatorlar táýekel deńgeıine qaraı shaǵyn, orta jáne iri bolyp bólinedi. Osyǵan baılanysty talaptar da ártúrli bolady. Іri operatorlarǵa jáne jabyq derektermen jumys isteıtin operatorlarǵa derekterdi qorǵaý boıynsha joǵary talaptar qoıylady. Osylaısha, jeke derekter salasynda táýekelge negizdelgen retteý modeli engiziledi, - dedi depýtat.
Ekinshiden, zań jobasynda jarııa bolyp ketken jeke derekterdiń tizilimi engiziledi. Ár azamat memlekettik aqparattyq júıe arqyly qandaı jeke derekteri ashyq tarap ketkenin teksere alady. Bul adamdarǵa óz derekterin qorǵaý úshin der kezinde shara qoldanýǵa múmkindik beredi.
- Jeke derekter jarııalanǵan kezde jáne olarmen almasý kezinde qorǵaý talaptary kúsheıtiledi. Jeke derekterdi jasyrý jáne heshteý talaptary engiziledi. Mysaly, sot sheshimderi nemese memlekettik satyp alýǵa qatysty qujattar sııaqty ashyq jarııalanýy mindetti qujattarǵa qatysty. Mundaı qujattarda jeke aqparattyń kóp kólemi bolýy múmkin. Sondyqtan keıbir derekterdi zańsyz paıdalanýdy boldyrmaý úshin olar jasyrylýy tıis. Sonymen qatar, operatorlar arasynda derekter almasý kezinde de jeke derekterdi shıfrlaý talaptary engiziledi, - dedi Ekaterına Smyshlıaeva.
Munymen qosa, zań jobasy aıasynda azamattardyń jeke derekterin ashyq jarııalaýǵa kelisim berý talaptary naqtylanady. Taǵy bir bólim kıberqaýipsizdik máselelerine arnalǵan. Zań jobasynda tsıfrlyq ınfraqurylymnyń asa mańyzdy obektilerine memlekettik baqylaý fýnktsııalaryn qaıta bólý qarastyrylǵan. Bul obektilerdi basqarý saıasaty Jasandy ıntellekt jáne tsıfrlyq damý mınıstrliginiń quzyretinde qalady.
Al memlekettik baqylaý fýnktsııalaryn Qazaqstan Respýblıkasy Ulttyq qaýipsizdik komıtetine berý usynylady. Atalǵan norma QR Prezıdentiniń kıberqaýipsizdikti kúsheıtý týraly Jarlyǵyn oryndaý maqsatynda engizilip otyr.
Budan buryn habarlanǵandaı, júrgizýshilerdi daıarlaýdyń ashyqtyǵy men sapasyn arttyrý úshin avtomektepterdi ashý habarlamadan ruqsat berý tártibine kóshiriledi.
