Avtomektepterdegi olqylyq áshkerelenip, 701 oqý toby jabyldy
ASTANA. KAZINFORM — ІІM-niń aýmaqtyq bólimsheleri avtomektepterdiń qyzmetin tekserdi, – dep habarlaıdy Polisia.kz.
Qazirgi ýaqytta 727 avtomektep júrgizýshilerdi daıarlaıdy. Tekserý barysynda avtodromdarda jol belgileri, jol tańbalary men jaryqtandyrýdyń jetkiliksiz ekeni, sondaı-aq keıbir kólik quraldarynyń aqaýy bar ekeni anyqtaldy. Osy kemshilikterdi joıý úshin 20 uıǵarym berildi.
Sonymen qatar júrgizýshilerdi daıarlaý úshin mindetti tehnıkalyq tekserýden ótpegen jáne saqtandyrý polısi joq avtokólikti paıdalanǵan 59 oqý uıymy anyqtaldy. Nátıjesinde, qazirgi tańda ІІM Ákimshilik polıtsııa komıteti avtomektepterdiń 701 oqý tobynyń qyzmetin toqtatty.
Avtomektepterdiń esebin júrgizý jáne oqý toptaryn tirkeý «Avtomektep» aqparattyq júıesimen júzege asyrylady. «Avtomektep» AJ kómegimen onlaın rejıminde berilgen kýáliktiń zańdylyǵyn, saǵattyq oqý baǵdarlamasyn, oqý avtokóligin esepke alýdy tekserýge bolady.
Sonymen qatar oqý uıymdarynyń qyzmetine baqylaýdy odan ári kúsheıtý maqsatynda avtomektepterdi ashýdyń habarlama tártibinen ruqsat berý tártibine kóshýdi, sondaı-aq olardyń qyzmetine memlekettik baqylaý tetikterin engizýdi kózdeıtin «Jol júrisi týraly» zańǵa ózgeris engizý jóninde zań jobasy ázirlendi.
Qazir zań jobasy Parlament Májilisinde qaralyp jatyr.
Aıta keteıik, júrgizýshilerdi daıarlaýdyń ashyqtyǵy men sapasyn arttyrý úshin avtomektepterdi ashý habarlamadan ruqsat berý tártibine kóshiriledi. Bul týraly Májilis depýtattarynyń saýalyna Premer-mınıstrdiń birinshi orynbasary Roman Sklıardyń jaýabynda aıtylǵan.
Kólik júrgizýshilerin daıarlaý qaǵıdalaryna sáıkes, avtomektepterdiń qyzmetin esepke alý jáne oqý toptaryn tirkeý protsesin avtomattandyrý maqsatynda QR ІІM «Avtomektep» aqparattyq júıesin ázirledi.
