Avtomektepterde kýrsanttardyń sabaqqa qatysýy bıometrııamen tekseriledi
ASTANA. KAZINFORM – Elimizde júrgizýshilerdi daıarlaý júıesin tsıfrlandyrý men baqylaýdy kúsheıtý máselesi qaıta kún tártibine shyqty. Májiliste qaralyp jatqan zań jobasy avtomektep kýrsanttaryn bıometrııa arqyly sáıkestendirýdi engizýdi kózdeıdi. Bastama jalǵan sertıfıkattar men formaldy oqytýdyń aldyn alýǵa baǵyttalǵan.
Astanada ótken sarapshylardyń dóńgelek ústelinde jańa tsıfrlyq tetikterdiń iske asyrylý barysy talqylandy. CarLife.kz ókili Ádil Álibekov qazirgi tańda ІІM engizgen «Avtomektep» aqparattyq platformasy oqý protsesin tsıfrlandyrýǵa negiz bolyp otyrǵanyn atap ótti.
– «Avtomektep» aqparattyq júıesi – ІІM-niń esebinde turǵan memlekettik aqparattyq júıe. Júıeniń ıntegratsııalyq servısi Smart Bridge platformasynda jarııalanǵan jáne jalpyǵa birdeı qoljetimdi. Qazirgi ýaqytta atalǵan platforma arqyly «CarLife» kásibı birlestigine tıesili «Avtomektep.kz» memlekettik emes aqparattyq júıesi qosylǵan. Onyń negizinde, polıtsııa usynysy boıynsha, kýrsant sabaqqa kelgen kezde bıometrııa arqyly júıede tirkeledi. Osylaısha onyń oqý ornynda ekeni rastalady. Sonymen qatar oqytýshynyń da sabaqta bolýy mindetteledi, ıaǵnı tikeleı oqý protsesi júrgiziledi, – dedi Ádil Álibekov.
Mamannyń aıtýynsha, júıe naryqtaǵy formaldy oqytý máselesin azaıtýǵa múmkindik beredi.
– Oqý aqysyn tómendetý arqyly olar shyn máninde qyzmet kórsetpeı, tek sertıfıkat satady. Tsıfrlandyrý bul máseleni joıyp, adal básekelestikti qalyptastyrady, – dedi ol.
Degenmen bastamaǵa qatysty syn-pikirler bar. Soltústik Qazaqstandaǵy júrgizýshilerdi daıarlaý uıymdary qaýymdastyǵynyń basshysy Vıktorııa Gımelraıh bıometrııalyq baqylaý júıesine kúmánmen qaraıdy.
– Birinshiden, bul adam quqyǵyn buzady. Ekinshiden, kez kelgen bıometrııany aınalyp ótýge bolady. Polıtsııa qyzmetkeri kelip, sabaqtyń shyn máninde ótip jatqanyn teksere alady. Biraq biz jalpy memlekettik baqylaýǵa qarsy emespiz, – dedi ol.
Onyń pikirinshe, máseleni tek tsıfrlyq baqylaý arqyly sheshý jetkiliksiz, salada keshendi reforma qajet. Bul rette depýtattar júıedegi olqylyqtarǵa jiti nazar aýdaryp otyr. Buǵan deıin Májilis depýtaty Nurtaı Sabılıanov avtomektepterdiń jumys tártibi tolyq baqylaýda emestigin alǵa tartqan edi.
– Zań jobasy júrgizýshilerdi daıarlaıtyn mektepterdiń qyzmetin retteýdi kózdeıdi. Qazirgi ýaqytta elimizde 727 avtomektep bar. Olar «habarlamalyq» tártip boıynsha jumys isteıdi, ıaǵnı avtomektepke ruqsat alýdyń qajeti joq. Egov portaly arqyly qyzmettiń bastalǵany týraly habarlama jiberý jetkilikti. Memleket olardy aldyn ala teksermeıdi. Baqylaý júrgizilmeıdi. Bul keıbir avtomektepterdegi oqytý sapasynyń tómendeýine ákep soǵyp otyr. Sondyqtan endi avtomektepterdiń qyzmetine ruqsat berý tártibi engiziledi, – dedi depýtat.
Eske salaıyq, Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine jol qaýipsizdigin tsıfrlandyrý jáne júrgizýshilerdi daıarlaý salasyndaǵy kásipkerlik qyzmet máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
