Avtomektepterdi ár adamnan aqsha jınaýǵa kim májbúrlep otyr: ІІM tekseris bastady

Onyń aıtýynsha, depýtattarǵa avtomektepterge qatysty turǵyndardan shaǵymdar kóbeıgen.

- Qazir júrgizýshi kýáligin alý úshin árbir adam 2,5 aı avtomektep bazasyna tirkeledi, tolyq kýrstan ótýge mindetti. Bul óz kezeginde durys talap. Osy úshin árkim oqý aqysyn tóleıdi. Biraq odan bólek avtomekteptiń kireberisinde QR-kod turady jáne ol boıynsha 8,5 myń teńge tóleýge mindettisiń. Bul tólem avtomektepke qatysy joq. Jylyna shamamen 670 myń adam júrgizýshi kýáligine tapsyrady. Árqaısy 8,5 myń teńgeden tólese, jylyna 5,6 mlrd teńge jınalady. Bul qomaqty qarajat kimniń qaltasyna ketip jatyr? Osy aqsha Úkimetke de, ІІM júıesine de túspeıdi, ıaǵnı ashyq esepte joq. Aldyn ala málimet boıynsha bul qarajat shetelde turatyn jeke adamnyń qaltasyna túsip jatyr. Bul ashyq túrde qalyptasqan «kóleńkeli» qarjy aınalymy jáne yqtımal lobbıstik shema emes pe? Avtomektepterdi ár azamattan mindetti túrde aqsha jınaýǵa kim májbúrlep otyr? Bul zańsyz qarjy aınalymyn qashan toqtatasyzdar? Resmı tekseris qashan bastalady?, - dep surady Májilis depýtaty Maqsat Tolyqbaı.

Óz kezeginde Іshki ister mınıstriniń orynbasary Sanjar Ádilov bul másele buǵan deıin Májilistegi jumys tobynyń otyrysynda kóterilgenin eske saldy.

- Qazir Ákimshilik polıtsııa komıteti qyzmettik tekseris bastady. Sonymen qatar, zań jobasy aıasynda jumys tobyndaǵy talqylaý kezinde durys sheshim qabyldanǵan edi. Sondyqtan avtomektepter men ákimshilik polıtsııa arasynda eshqandaı túrli odaqtar men deldaldar bolmaýy kerek ekeni naqtylandy. Bul rette sybaılas jemqorylyqqa jol berilmeýi kerek. Osy turǵyda shara qabyldaımyz, - dedi mınıstrdiń orynbasary.

Budan buryn habarlanǵandaı, búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine jol qaýipsizdigin tsıfrlandyrý jáne júrgizýshilerdi daıarlaý salasyndaǵy kásipkerlik qyzmet máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.