Avtomektepter júrgizýshi daıarlaý isine atústi qarap otyr - ІІM
ASTANA. 12 aqpan. QazAqparat - Elimizdegi avtomektepter júrgizýshi daıarlaý isine atústi qarap otyr. Búgin Parlament Májilisinde «Jol júrisi týraly» jańa zań jobasyn talqylaý barysynda Іshki ister mınıstriniń orynbasary Erlik Kenenbaev osylaı málim etti.
Toqtala ketetin jaıt, qujatty talqylaý barysynda depýtat Ergen Doshaev júrgizýshilerdi daıarlaýmen aınalysatyn elimizdegi oqytý oryndarynyń jaýapkershiligin kúsheıtýdi talap etken bolatyn. Onyń aıtýynsha, byltyr jol qozǵalysy erejelerin 14 myńǵa tarta júrgizýshi buzsa, solardyń edáýir bóligi júrgizýshi kýáligin jańadan alǵandar eken. «Bul faktiniń ózi elimizdegi avtomektepterdiń atústi oqytatyndyǵyn bildirmeı me? Bundaı avtomektepterdiń sany shamamen 900-deı zańdy tulǵany qurasa, jyl saıyn olarda shamamen 400 myńdaı qazaqstandyq oqıdy. Avtomektepterdiń jumysy úshin búgingi kúnde eshqandaı shekteýshi tetik te joq. Sondyqtan olar buny bıznes kózine aınaldyryp, júrgizýshilerdiń sapaly daıarlanýyna az kóńil bóledi», - deıdi E. Doshaev.
Óz kezeginde depýtattyń kótergen máselesimen Іshki ister mınıstriniń orynbasary Erlik Kenenbaev ta kelisti. «Shyndyǵynda elimizde avtokólik júrgizýshilerin daıarlaıtyn 900-ge tarta mektep bar. Alaıda, onda oqyp shyqqan júrgizýshilerdiń sapasy talaptarǵa saı kelmeıdi. Árıne, biz oqý úderisterin baqylaı almaımyz. Degenmen, emtıhan qabyldaýlary barysynda bizdiń ókilder qatań talaptardy eskerip jumys isteıtin bolady. Bul baǵytta biz maqsatty jumystar jasaýǵa ázirmiz», - dedi E. Kenenbaev.
