Avtomattandyrylǵan elektr qýatyn baqylaý jáne esepteý júıesiniń artyqshylyǵy az emes - Energetıkalyq keden beketiniń basshysy
ALMATY. 1 qarasha. QazAqparat /Ádilet Musahaev/ - Avtomattandyrylǵan elektr qýatyn baqylaý jáne esepteý júıesiniń (AEBEJ) artyqshylyǵy QR shekarasy arqyly ótkiziletin elektr qýatynyń kólemi týraly aqparatty qashyqtyqtan úzdiksiz jınaıdy,
óńdeıdi, saqtaıdy, aıqyn kórsetedi jáne ótkizedi. Bul jaıynda 29 qazan kúni ótken jýrnalıstik týr barysynda "Energetıkalyq" keden beketiniń basshysy Erkebulan Saǵıtov aıtty.
«Uıaly baılanys, ınternet qurylǵylarynyń kórsetkishteri shynaıy ýaqytta Kedendik baqylaý departamenti men QR Qarjy mınıstrligi kedendik baqylaý komıtetiniń serverlerine kelip túsedi. Esep qurylǵylarynyń kórsetkishteri usynylǵan kommertsııalyq aqparattarmen salystyrylady», - dep atap ótti óz sózinde E.Saǵıtov.
Sondaı-aq ol Almatynyń elimizdiń qýat kózin kóp paıdalanatyn qalalardyń biri ekendigin aıta kele, kún saıyn kórshi memleketter men basqa da aımaqtardan qubyr jáne elektr ótkizgish jelileri arqyly kógildir otyn, munaı ónimderi men elektr qýaty sııaqty energııa qorlary kelip túsetindigin jetkizdi. "Degenmen óte qajetti taýar zańnamalarǵa sáıkes kedendik rásimdeýdi qajet etedi. Tek osy jyldyń sońǵy 9 aıynda bekettiń syrtqy saýda aınalymy 232950,644 myń AQSh dollaryn qurady. Bıýdjetke 3 mlrd. teńge kedendik túsimder men salyqtar túsimi quıyldy", deıdi "Energetıkalyq" keden beketiniń basshysy.
