Avtomattandyrylǵan daktıloskopııalyq júıeni iske qosý bir jylǵa shegeriledi

ASTANA. QazAqparat – Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine Memleket basshysynyń jekelegen tapsyrmalaryn iske asyrý máseleleri boıynsha ózgerister men tolyqtyrýlar engizý týraly» zań jobasy eki oqylymda qaraldy. Qujatqa túzetýler engizilgendikten zań jobasy Májiliske qaıtaryldy, dep habarlaıdy QazAqparat tilshisi.

Zań jobasyndaǵy normalar kóptegen saladaǵy máselelerdi sheshýge baǵyttalǵan. Atap aıqanda, óńirlerdiń qarjylyq derbestigin odan ári arttyrý úshin salyq túsimderiniń jekelegen túrlerin jergilikti bıýdjetke berý kózdelip otyr. Túzetýler memlekettik satyp alýdaǵy básekelestik ortany keńeıtýge jáne osy saladaǵy sybaılas jemqorlyq táýekelderin azaıtýǵa jaǵdaı jasaıdy. Zań jobasy monopolııa operatorlaryn retteý mehanızmin qaıta qaraýdy jáne memlekettik-jekeshelik seriktestikti iske asyrý tásilderin jetildirýdi de qamtıdy.

Jalpy, senatorlar zań jobasyn qoldady. Alaıda, qujatty qaraý barysynda depýtattar oǵan birqatar ózgertýler engizýdi usyndy:

1. Bıýdjet kodeksiniń 41-babynyń 4-1-tarmaǵyna sáıkes memlekettik tapsyrmalarǵa jatqyzylýy múmkin tapsyrystardyń tizbesi aıqyndaldy jáne olar túpkilikti bolýǵa jáne keńeıtilip túsindirýge jatpaýǵa tıis. Osyǵan baılanysty memlekettik tapsyrmany naqtylaıtyn ózgerister engizildi.

2. Avtomattandyrylǵan daktıloskopııalyq aqparattyq júıeni iske qosý jónindegi is-sharalardyń jetkiliksiz qarjylandyrylýyna baılanysty, ony tolyq kólemde iske qosý merzimin 2023 jylǵy 1 qańtardan 2024 jylǵy 1 qańtarǵa aýystyrý usynyldy.

3. 2022 jylǵy 1 qyrkúıektegi Prezıdent Joldaýy aıasynda Qazaqstanǵa 2022 jyldyń 1 qyrkúıegine deıin ákelingen jáne elimizdiń zańnamasyna sáıkes memlekettik tirkeýden ótpegen sheteldik avtomobılderdi birjolǵy zańdastyrýdy júrgizý mindeti qoıyldy. Osyǵan baılanysty EAEO-ǵa múshe memleketterde aınalymǵa shyǵarylǵan jáne 2022 jylǵy 1 qyrkúıekke deıin Qazaqstan aýmaǵyna ákelingen basqarý organdary oń jaqta ornalasqan avtomobılderge aldaǵy zańdastyrý aıasynda tyıym salýdy alyp tastaý bóliginde «Jol qozǵalysy týraly» QR zańyna túzetý usynyldy.

4. Investıtsııalardy ulǵaıtý jáne kommýnaldyq jelilerdiń tozýyn azaıtý úshin qajetti jumystardy júrgizý maqsatynda «Tabıǵı monopolııalar týraly» Zańyna bekitilgen tarıfti onyń qoldanylý merzimi aıaqtalǵanǵa deıin ózgertý úshin qosymsha negizdi kózdeıtin túzetýler usynyldy.

«Memleket basshysynyń tapsyrmasyna sáıkes elge 2022 jylǵy 1 qyrkúıekke deıin ákelingen rýli oń jaqta ornalasqan avtokólikter boıynsha bastapqy tirkeý múmkindigin berý usynyldy. Bul 20 myńǵa jýyq azamatymyzǵa óz kólikterin zańdastyrýǵa múmkindik beredi. Sondaı-aq senatorlar azamattardyń banktik, salyqtyq qupııasyna qol jetkizý máselelerine qatysty ýákiletti organdarǵa negizsiz keń ókilettikter beretin jekelegen erejelerdi alyp tastady. Osy zań qabyldanǵannan keıin halyqtyń ál-aýqatyn jaqsartýǵa oń áserin tıgizedi dep senemiz», – dedi Senat tóraǵasy Máýlen Áshimbaev.

QR Ulttyq ekonomıka mınıstrligi málimetine qaraǵanda, zań jobasynda «Samuryq-Qazyna» qorynyń satyp alý qaǵıdalaryn Básekelestikti qorǵaý jáne damytý agenttigimen kelisýdiń mindettiligi kórsetilgen.

Sonymen qatar Qordyń holdıngishilik kooperatsııasy aıasynda satyp alý tásilin alyp tastaý normasy kózdelgen.

Foto: europa.eu