Avtomattandyrý salasynda qazaqstandyq ónimderine suranysty qamtamasyz etý qajet
ASTANA. QazAqparat - Avtomattandyrý salasynda qazaqstandyq zertteýlerge basymdyq berilip, olardyń ónimderine suranysty qamtamasyz etetin ýaqyt jetti. Bundaı pikirdi Qazaqstannyń IT-kompanııalar qaýymdastyǵynyń prezıdenti Nurlan Isın astanada ótken «Qazaqstan: XXI ǵasyrdaǵy avtomattandyrý» atty dóńgelek ústel barysynda málim etti.
Jıynǵa qatysýshylardyń paıymynsha, avtomattandyrý salasynda otandyq jobalar básekege qabilettiligin kórsete alatyn deńgeıge jetip otyr.
«Alaıda daıyn ımporttyq usynystyń qyspaǵy saldarynan otandyq ónimge suranys tómen. Rasynda, Qazaqstanda salalardy avtomattandyrý isinde ımporttyq usynystarǵa basymdyq berilip keledi», - deıdi Qazaqstannyń IT-kompanııalar qaýymdastyǵynyń prezıdenti Nurlan Isın. Onyń pikirinshe, qarjy men bank, munaı-gaz, metallýrgııa, kólik jáne energetıka sekildi elimizdiń kóptegen salalary áli kúnge deıin tek asa qymbat sheteldik avtomattandyrý jobalaryn engizip otyr.
«Meniń oıymsha, venderler men sheteldik kompanııalardyń usynystarynyń yqpalymen júre berýge bolmaıdy. Qazaqstandyq zertteýshilerge basymdyq berilip, olardyń ónimderine suranysty qamtamasyz etý týraly oılaný qajet, áıtpese elimiz sheteldik kompanııalardyń «tutqynynda» qalyp, barlyq otandyq mamandar olardyń jumysshylaryna aınalatyn bolady», - deıdi N. Isın.
Bul rette qaýymdastyq basshysy qazirgi zamanǵy avtomattandyrýdy jurtshylyq kóbinese aqparattyq tehnologııalar retinde ǵana qabyldaıtynyn alǵa tartady.
«Avtomattandyrý - budan da keńirek uǵym jáne ol aqparattandyrý úrdisi kómegimen jasalynady», - dedi ol. Jıyn barysynda málim bolǵanyndaı, ARTA Software, NEWinttech, Asia Soft, Dynamics Technologies, ARTA Learning Solutions sekildi otandyq kompanııalardyń tájirıbesi qazaqstandyq ónimderdiń avtomattandyrý boıynsha jemisti tájirıbe jınaqtaǵanyn aıqyn ańǵartady.
