Avtomagıstraldaǵy 7 basty tyıym: júrgizýshilerge arnalǵan ereje
ASTANA. KAZINFORM — Qazaqstanda avtomagıstral joldarymen júrý erejeleri túsindirildi. Jol júrisi qaǵıdalaryna sáıkes, joǵary jyldamdyqpen qozǵalysqa arnalǵan bul joldarda júrgizýshilerge birqatar shekteý qoıylǵan.
QazAvtoJol avtomagıstralda qaýipsizdikti qamtamasyz etý maqsatynda qoldanylatyn basty erejelerdi eske saldy.
Avtomagıstraldar - joǵary jyldamdyqpen júrýge arnalǵan joldar. Mundaı trassalarda qaýipsizdikti qamtamasyz etý úshin Jol júrisi qaǵıdalarynda (JJQ) jalpy joldardan ózgeshe arnaıy talaptar kózdelgen.
Avtomagıstralda nege tyıym salynady?
1. Jaıaý júrginshiler men janýarlarǵa
Avtomagıstralda kólikten tys júrýge bolmaıdy. Bul ereje jaıaý júrginshilerge de, úı janýarlaryna da qatysty.
2. Baıaý qozǵalatyn kólik quraldaryna
Kelesi kólik túrleriniń qozǵalysyna tyıym salynady:
* velosıpedterge;
* mopedterge;
* traktorlarǵa;
* ózdiginen júretin mashınalarǵa;
* tehnıkalyq sıpattamasyna nemese jaı-kúıine baılanysty jyldamdyǵy 40 km/saǵ-tan tómen basqa da kólikterge.
3. Júk kólikterine
Salmaǵy 3,5 tonnadan asatyn júk kólikterine ekinshi jolaqtan ári shyǵyp, qozǵalýǵa (ıaǵnı 3-shi jáne odan keıingi jolaqtarmen júrý) tyıym salynady.
4. Arnaıy turaqtardan tys toqtaýǵa
Toqtaýǵa tek jol belgilerimen belgilengen turaqqa arnalǵan arnaıy alańdarda (5.15 nemese 6.11 belgilerimen) ǵana ruqsat etiledi. Bul jerlerden tys toqtaýǵa qatań túrde tyıym salynǵan.
5. Burylystar men tehnologııalyq aıyrymdar
Avtomagıstraldarda joldy bólip turǵan tosqaýyldardyń tehnologııalyq aıyrymdarynda keri burylýǵa jáne oǵan kirýge tyıym salynady.
6. Artqa qaraı qozǵalýǵa
Avtomagıstraldarda keri baǵytta (artqa) júrýge qatań tyıym salynady.
7. Kólik júrgizip úırenýge
Avtomagıstraldarda kólik júrgizip úırenýge ruqsat etilmeıdi.
Májbúrli toqtaǵan jaǵdaıda ne isteý kerek?
Eger kólik buzylyp qalsa nemese basqa da tótenshe jaǵdaı bolsa:
* Kólik quralyn JJQ-nyń 7 bólimine sáıkes belgileńiz (mysaly, avarııalyq shammen nemese apattyq toqtaý belgisimen).
* Kólikti jol jıegine nemese shetki jolaqqa shyǵaryńyz, ıaǵnı júrý bóliginiń shetin bildiretin syzyqtyń syrt jaǵyna.
Bul erejeler taǵy qaıda qoldanylady?
Atalǵan talaptar tek avtomagıstraldarda ǵana emes, 5.3 «Avtomagıstral» jol belgisimen belgilengen barlyq joldarǵa qatysty qoldanylady.
Júrgizýshilerge keńes
Avtomagıstralǵa shyqpas buryn:
* Kóliktiń tehnıkalyq jaı-kúıin tekserińiz;
* Qozǵalys jyldamdyǵyńyz keminde 40 km/saǵ bolatynyna kóz jetkizińiz;
* Jol belgileri men syzyqtaryn muqııat qarap shyǵyńyz;
* Eger siz júk kóligin júrgizip kele jatsańyz, jolaq tártibin mindetti túrde saqtańyz.
Aıta ketelik elordada jol erejesi kameralaryn tıisti quralsyz teksergen zerthana jumysyn toqtatty.