Avtolızıngtiń avtonesıeden qandaı artyqshylyǵy bar
ASTANA. KAZINFORM – Ónerkásip jáne qurylys mınıstrligi men Qazaqstannyń avtokólik odaǵy Úkimet otyrysynan keıingi brıfıngte jeke tulǵalarǵa arnalǵan avtolızıngtiń artyqshylyqtary men onyń avtonesıeden aıyrmashylyǵyn túsindirdi.
– Bul baǵdarlama tıimdi dep esepteımiz. Óıtkeni, ol – avtokólik satyp alýdyń qosymsha múmkindigi. Iá, alǵashqy aılarda memlekettik organdar birqatar qosymsha usynysyn jetkizip, olardyń barlyǵy pysyqtaldy. Jaqyn arada tıisti aqparat jarııalanady dep oılaımyn, – dedi Ersaıyn Naǵaspaev.
Al Qazaqstannyń avtokólik odaǵynyń prezıdenti Anar Maqasheva bul tetiktiń avtonesıeden aıyrmashylyǵyn túsindirdi.
– Avtokólikti nesıege alǵanda, ol birden sizdiń atyńyzǵa rásimdeledi. Bul jerde tek qarjylyq mindetteme bolady, ıaǵnı siz kóliktiń qunyn belgili bir merzimde tóleısiz. Al lızıng – ózgeshe tetik. Avtokólik lızıngtik kompanııanyń, ıaǵnı zańdy tulǵanyń atyna rásimdeledi. Kompanııa qarjy beredi. Satyp alýshy ózi júrgizgisi keletin kólikti tańdaıdy. Merzim sońynda ony satyp alýyna da, almaýyna da bolady. Tańdaý múmkindigi bar, – dedi Anar Maqasheva.
Onyń aıtýynsha, baǵdarlamanyń basty artyqshylyǵy – avtonesıemen salystyrǵanda sharttary tıimdi.
– Satyp alýshy avtokólikti bastapqy jarnamen de, bastapqy jarnasyz da ala alady. Sondaı-aq, belgili bir merzimge servıstik qyzmetterdiń tolyq paketimen rásimdeýine bolady. Odan bas tartyp, tehnıkalyq qyzmet kórsetý men jóndeý jumystaryn óz qarajaty esebinen júrgizýdi tańdaýǵa da múmkindik bar, – dep túsindirdi Anar Maqasheva.
Aıta keteıik, buǵan deıin jeke tulǵalarǵa arnalǵan avtolızıng baǵdarlamasy qaıta iske qosylatynyn jazǵanbyz.
