Avtokólikterge memlekettik týdy ilý boıynsha Mádenıet mınıstrligi málimdeme jasady

ASTANA. KAZINFORM – Táýelsizdik kúnin merekeleý barysynda áleýmettik jelilerde eldiń memlekettik týyn avtokólikterde paıdalaný máselesi keńinen talqylandy. 

Atap aıtqanda, avtokólik syrtyna memlekettik týdy ilgen azamattardy jol-patrýldik polıtsııa qyzmetkerleri túrli sebeptermen toqtatqany jóninde aqparattar jarııalandy.

Aıta keteıik, memlekettik týdy kólikke ornalastyrǵan azamat ákimshilik jaýapkershilikke tartylmaıdy. 

Іshki ister mınıstrligi men aımaqtyq polıtsııa departamentteriniń túsindirýinshe, 16 jeltoqsanda kólik júrgizýshileri tek jol qozǵalysy erejelerin buzǵan jaǵdaıda ǵana toqtatylǵan.

— Memlekettik rámizderdi qoldanýdyń zańmen belgilengen erejeleri bar. Mádenıet jáne aqparat mınıstrligi olardyń durys qoldaný tártibin qadaǵalaıdy. Biz azamattardyń patrıottyq sezimin bildirý, qazaqstandyq biregeılikti saqtaý, el men azamattardyń jetistikterin nasıhattaý maqsatynda memlekettik rámizderdi paıdalanýdy qoldaımyz, biraq ol qoldanystaǵy zańnama sheńberinde júzege asýy tıis, — delingen mınıstrlik habarlamasynda.

Qazaqstanda «Zań jáne tártip» qaǵıdasy túrli jaǵdaılar men azamattyq belsendilikke qaramastan, barlyǵyna birdeı. 

Aıta ketelik Táýelsizdik kúni kólikterdi zańsyz toqtatqan polıtseıler jaýapkershilikke tartylatyny týraly jazǵan edik.