Avtokólikterdi jýý men monshalarǵa jylyna qansha sý jumsalady

ASTANA. KAZINFORM – Elimizde avtokólikterdi jýý men monshalarǵa jylyna qansha kólemde sý jumsalatyny aıtyldy.

«Ortasha alǵanda bir avtokólikti jýýǵa shamamen 200-250 lıtr sý jumsalady. Júk mashınalary men avtobýstardy jýýǵa 500-700 lıtr sý ketedi. Bul jylyna shamamen 100 mln tekshe metr sý degen sóz. Al monsha keshenderiniń sýdy tutynýy jylyna shamamen 120 mln tekshe metrdi quraıdy», - dedi Sý resýrstary jáne ırrıgatsııa mınıstri Nurjan Nurjigitov Májiliste ótip jatqan «Respýblıkadaǵy sarqyndy sýlardy qaıta paıdalanýdyń problemalary men perspektıvalary» atty dóńgelek ústelde jasaǵan baıandamasynda. 

Mınıstr keltirgen derekterge súıensek, 2023 jylǵy 1 qazandaǵy jaǵdaı boıynsha Qazaqstanda tirkelgen avtokólik quraldarynyń sany shamamen 5 mln birlik. Onyń 88,1%-y jeńil avtomobılder, 10%-y júk jáne 2,1%-y avtobýstar. 2022 jyldyń sáıkes kezeńimen salystyrǵanda avtomobılder sany orta eseppen 18,3%-ǵa ósken. Atap aıtqanda, jeńil avtomobılder 18,6%, júk kólikteri 15%, avtobýstar 23,4%-ǵa artqan. 

«Qazirgi ýaqytta shaǵyn jáne orta bıznes obektilerinde (avtokólik jýý oryndary, saýnalar, monsha keshenderi, jóndeý óndiristik keshenderi, beton-aralastyrǵysh toraptar, temirbeton buıymdaryn shyǵaratyn zaýyttar jáne t.b.) sý resýrstaryn qaıtalama paıdalaný tehnologııalaryn engizý qajet», - dep tolyqtyrdy vedomstvo basshysy.