Jeke kólik asa joǵary aýqattylyq belgisine aınalýy tıis - Ózbekstan prezıdenti
TAShKENT. KAZINFORM – Ózbekstan prezıdenti Shavkat Mırzıeev vıtse-premer Achılbaı Ramatov jáne basqa da jaýapty basshylarǵa Tashkenttegi kólik keptelisin sheshýdi tapsyrdy, dep habarlaıdy Kazinform agenttiginiń menshikti tilshisi Álıhan Asqar.
Ózbekstan basshysynyń baspasóz qyzmetinen málimdegendeı, keńes barysynda Shavkat Mırzıeev Tashkenttegi kólik qozǵalysynyń úlken máselege aınalyp bara jatqanyn aıtyp, salany synǵa aldy. Jumys kúnderi keıbir kóshelerdegi keptelis kólemi orta eseppen 7-9 ball, keıde 10 balǵa jetip jatady. Al birqatar kóshede artyq júkteme bar. Nátıjesinde qarbalas ýaqytta mejeli jerge barý úshin 2 ese kóp ýaqyt ketedi.
Osyǵan baılanysty Shavkat Mırzıeev vıtse-premer Achılbaı Ramatovqa, Kólik mınıstrligine jáne Tashkent hokımıatyna máseleni sheshý boıynsha júıeli usynys daıyndaýdy tapsyrdy.
«Qala qurylysy men jol qozǵalysyna jaýapty barlyq basshylar «Qala jaıaý júrginshiler úshin» degen paıymdy ózderiniń basty qaǵıdasy etýi kerek. Bul rette qoǵamdyq kólikke basymdyq berilip, jeke avtomobıl asa joǵary aýqattylyq belgisine aınalýy tıis», - dedi Ózbekstan prezıdenti.
