Avtokólikter men júk tasymaldaý kezinde alaıaqtyq kóbeıdi: neni bilý kerek
ASTANA.KAZINFORM - Sońǵy ýaqytta logıstıkalyq platformalar arqyly avtokólikter men túrli júkterdi tasymaldaý kezinde alaıaqtyq faktileri kezdesip jatyr, - dep jazdy Polisia.kz.
Qaskóıler «Della» jáne «Fa-Fa.kz» sııaqty servısterdi paıdalanady. Kóbinese avtokólikter men júkterdi Almaty qalasy men Almaty oblysynan elimizdiń basqa óńirlerine jetkizý týraly habarlandyrýlar ornalastyrylady. Habarlandyrý jarııalanǵannan keıin alaıaqtar tapsyrys berýshilermen jáne júrgizýshilermen WhatsApp messendjeri arqyly baılanysady.
Tapsyrys berýshilerge ózderin tasymaldaýdy uıymdastyrýshy nemese júrgizýshi retinde tanystyrsa, júrgizýshilerge ózderin júk ıesi retinde kórsetedi. Eki taraptyń da senimine kirgennen keıin tasymaldaý sharttary jóninde kelisim jasaıdy. Almaty qalasynan shyqqannan keıin alaıaqtar urlanǵan avtokólik nemese júkti basqa kólikke aýystyryp tıep, ony óz qalaýlarynsha paıdalanady.
Mysaly, 7 maýsymda Almaty qalasynyń turǵyny polıtsııaǵa óziniń qymbat avtokóliginiń urlanǵany týraly aryzdanǵan. Eki kún buryn belgisiz tulǵalar aldaý arqyly onyń kóligin ıemdenip, 60 mıllıon teńge kóleminde materıaldyq shyǵyn keltirgen. Ýaqytyly júrgizilgen jedel-izdestirý is-sharalarynyń nátıjesinde polıtsııa qyzmetkerleri urlanǵan avtokólikti taýyp, zańdy ıesine qaıtardy. Qylmys jasady degen kúdikpen úsh adam ustaldy.
Qazirgi ýaqytta sotqa deıingi tergep-tekserý júrgizilip jatyr. Oqıǵanyń barlyq mán-jaıy men basqa da yqtımal sybaılastary anyqtalady.
Osyndaı qylmystardyń aldyn alý maqsatynda ІІM azamattarǵa qaýipsizdik sharalaryn ustanýdy usynady:
- júrgizýshiniń jeke kýáligin jáne kólik qujattaryn muqııat tekserý;
- tasymaldaýshynyń telefon nómirin habarlandyrýda kórsetilgen nómirmen salystyrý;
- júrý baǵyty men jetkizýdiń sońǵy núktesin aldyn ala jeke talqylaý;
- ınternetten tasymaldaýshy men júrgizýshi týraly pikirlerdi zerdeleý.
Qujattarda sáıkessizdikter baıqalsa, kúmán týǵyzatyn basqa da jaǵdaılar anyqtalsa, tasymaldaýshynyń qyzmetinen bas tartyp, bul týraly dereý 102 nómirine habarlaý nemese jaqyn jerdegi krımınaldyq polıtsııa bólimine júginý usynylady.
Ýaqytyly qyraǵylyq tanytý jáne polıtsııaǵa júginý qylmystyń aldyn alyp, kinálilerdi jaýapkershilikke tartýǵa kómektesedi.
Aıta keteıik, Qostanaı turǵyny 30 mln teńgege alaıaqtyq jasaǵany úshin sottaldy.
