Avtokólikti tirkeý jáne tehnıkalyq pasportty aýystyrý onlaın rejıminde qoljetimdi boldy
ASTANA. KAZINFORM — eGov.kz elektrondy úkimet portalynda jáne eGov Mobile mobıldi qosymshasynda avtokólikterdi tirkeýge qatysty birqatar memlekettik qyzmet onlaın formatta qoljetimdi.
Paıdalanýshylar resmı dılerden satyp alynǵan avtokólikti tirkeýge qoıa alady, menshik ıesi ózgermegen jaǵdaıda tehnıkalyq pasport pen memlekettik tirkeý nómirlik belgilerin (MTNB) aýystyra alady, sondaı-aq menshik quqyǵy aýysqan kezde kólik quralyn satyp alý-satý rásimin elektrondyq túrde resimdeı alady.
Resmı dılerlerden satyp alynǵan avtokólikterdi bastapqy tirkeý
Endi Qazaqstanda óndirilgen avtokólikti bastapqy tirkeýden ótkizý onlaın júzege asyrylady. Qazirgi ýaqytta bul memlekettik qyzmet elimiz boıynsha 100-den astam iri dılerlik ortalyqta qoljetimdi. Olardyń qatarynda «Aster Auto» JShS, «Terra Motors Astana» JShS, «Allur Motor Qazaqstan» JShS, «Hyundai Auto Almaty» JShS, «Mycar Astana» JShS jáne basqa da avtosalondar bar. Sonymen qatar, ıntegratsııalyq servıske qosylýyna qaraı onlaın resimdeý múmkindigi bar avtosalondar tizimi kezeń-kezeńimen keńeıtilýde.
Qyzmetti alý úshin satyp alýshy avtosalonda avtokólikti tańdap, satyp alý-satý shartyn rásimdeıdi. Odan keıingi tirkeý rásimi qashyqtan, avtosalonǵa qaıta barýdy talap etpeı júzege asyrylady.
Dıler ótinim joldaǵannan keıin satyp alýshy eGov.kz portalyndaǵy jeke kabınetine habarlama alady nemese eGov Mobile qosymshasy arqyly push-habarlama túsedi. Paıdalanýshy derekterdiń durystyǵyn tekserip, usynylǵan nusqalar arasynan memlekettik tirkeý nómirlik belgilerin tańdaıdy jáne ótinimdi qoldanystaǵy tásilderdiń birimen rastaıdy. Osylaısha tirkeýdiń negizgi kezeńderi onlaın formatta oryndalady. Paıdalanýshylardyń yńǵaılylyǵy úshin MTNB tańdaý nusqalarynyń tizbesi de keńeıtildi. Qyzmet kórsetý merzimi — 2 saǵatqa deıin.
Daıyn qujattar men memlekettik tirkeý nómirlik belgileri tańdalǵan mamandandyrylǵan HQKO-dan beriledi.
Tehnıkalyq pasport pen memlekettik nómirdi aýystyrý
2026 jyldyń basynda memlekettik tirkeý nómirlik belgilerin onlaın tańdaý qyzmeti iske qosylyp, avtokólik ıeleri arasynda keń suranysqa ıe boldy.
Endi menshik ıesi ózgermegen jaǵdaıda tehnıkalyq pasport pen memlekettik nómirdi aýystyrý memlekettik qyzmeti de onlaın formatta qoljetimdi. Ótinim berilgen kezde júıe kólik quralyn aıyppuldar men aýyrtpalyqtardyń bar-joǵyna avtomatty túrde tekseredi. Qyzmet bir saǵat ishinde kórsetiledi.
Kólik quralyna qatysty shekteýler bolǵan jaǵdaıda, onyń ishinde kepilde turǵan nemese ózge de kedergi keltiretin mán-jaılar anyqtalsa, onlaın resimdeý múmkin bolmaıdy. Mundaı jaǵdaıda tirkeý áreketteri mamandandyrylǵan HQKO-ǵa jeke júginý arqyly júzege asyrylady.
Azamattar arasyndaǵy avtokólikti satyp alý-satý
Sondaı-aq eGov.kz portalynda jáne eGov Mobile mobıldi qosymshasynda jeke tulǵalar arasynda kólik quralyn satyp alý-satý shartyn elektrondyq formatta rásimdeý múmkindigi iske asyryldy.
Buǵan deıin bul múmkindik jekelegen bankterdiń servısteri aıasynda, naqty qarjy uıymdarynyń klıentteri úshin ǵana qoljetimdi bolatyn. Endi servıs memlekettik qyzmetter deńgeıinde ıntegratsııalanyp, mámileni resimdeýdiń biryńǵaı tsıfrlyq protsesin qamtamasyz etedi.
— Buǵan deıin Іshki ister mınıstrliginiń qoldaýymen iri bankterdiń mobıldi qosymshalarynda azamattar arasynda avtokólikti onlaın rásimdeý qyzmeti sátti iske qosylǵan bolatyn. Endi tsıfrlyq servıster tirkeý úderisiniń tolyq tsıklin qamtıdy: avtosalonnan jańa kólik satyp alýdan bastap, ártúrli bankterdiń klıentteri arasyndaǵy mámilelerge deıin, sondaı-aq tehnıkalyq pasport pen memlekettik nómirdi aýystyrý qyzmetterin de biriktiredi. Bul sáýir aıynan bastap mamandandyrylǵan HQKO-larǵa barý sanyn edáýir qysqartýǵa múmkindik beredi, — dep atap ótti Qazaqstan Respýblıkasynyń Jasandy ıntellekt jáne tsıfrlyq damý birinshi vıtse-mınıstri Rostıslav Konıashkın.
Kólik quraldaryn tirkeý salasyndaǵy onlaın servısterdi damytý azamattar men bıznes úshin rásimderdi jeńildetýge, oflaın ótinishter sanyn azaıtýǵa jáne tirkeý áreketteriniń ashyqtyǵyn arttyrýǵa baǵyttalǵan.
Jańartý Іshki ister mınıstrligi, Jasandy ıntellekt jáne tsıfrlyq damý mınıstrligi Memlekettik qyzmetter komıtetiniń jáne «Ulttyq aqparattyq tehnologııalar» AQ-nyń birlesken jumysy aıasynda júzege asyryldy.
Aıta ketelik Qazaqstannyń mashına jasaý salasy rekordtyq ósim kórsetken edi.
