Avtokólikti tehnıkalyq baıqaýdan ótkizý sapasyn tıimdi baqylaýdyń jańa tetikteri ázirlenedi

ASTANA. KAZINFORM — Avtokólikti tehnıkalyq baıqaýdan ótkizý sapasyn tıimdi baqylaýdyń jańa tetikteri ázirlenedi. Bul týraly búgin Úkimet otyrysynda Premer-Mınıstr Oljas Bektenov aıtty.

«Memleket basshysy qoǵamdyq qaýipsizdik máselelerine erekshe nazar aýdardy. Osyǵan baılanysty Іshki ister mınıstrligi múddeli memlekettik organdarmen birlesip, eki aı merzimde qylmyspen, onyń ishinde alaıaqtyqpen kúres boıynsha qosymsha sharalar keshenin ázirleýi qajet. Budan basqa, Іshki ister mınıstrligi esirtki qylmysyna qarsy is-qımyl jáne nashaqorlyqtyń profılaktıkasy jónindegi túzetýlerdi kózdeıtin zań jobasyn ilgeriletý jumysyn jandandyrýy qajet», - dedi ol.

Sondaı-aq, Oljas Bektenov jol-kólik oqıǵalarynyń jáne joldarda adamdardyń qaza bolý kórsetkishterin azaıtý máselelerine erekshe nazar aýdarý kerektigine toqtaldy.

«Sondyqtan Kólik mınıstrligine zııatkerlik júıelerdi engize otyryp, qaýipsiz jol ınfraqurylymyn qurýdy qamtamasyz etýdi, sondaı-aq osy jyldyń sońyna deıin avtokólikti tehnıkalyq baıqaýdan ótkizý sapasyn tıimdi baqylaýdyń jańa tetikterin ázirleýdi tapsyramyn», - dedi Úkimet basshysy.