Avtokólikpen júk tasymaly: otandyq kopanııalardyń úlesi qandaı

ASTANA. KAZINFORM — QR Kólik mınıstrligi avtokólikpen júk tasymaldaýshy otandyq kompanııalar qazir naryqtyń neshe paıyzyn qamtyp otyrǵany jaıynda túsinik berdi.

— 2023 jyldyń qorytyndysy boıynsha otandyq tasymaldaýshylardyń halyqaralyq júk tasymaldary naryǵyndaǵy úlesi 50% qurasa (2021 jyly — 31%, 2022 jyly — 43%), 2024 jyldyń 9 aı qorytyndysy boıynsha 51 paıyzǵa jetti, — delingen mınıstrliktiń Kazinform agenttigine bergen jaýabynda.

Atap aıtqanda, jalpy 2024 jyldyń qorytyndysy boıynsha statıstıkalyq málimetter bıylǵy aqpan aıynda daıyn bolady.

— Sonymen qatar 2025 jyldyń 1 qańtaryndaǵy jaǵdaıy boıynsha elimizde 9 500 kólik kompanııasy tirkelgen jáne olardyń 92 900 júk avtokóligi bar. Sonyń ishinde shamamen 58 myńy negizinen Qytaı jáne Ózbekstan baǵytynda júk tasymaldaryn júzege asyrady, al alys shetelge shamamen 2 400 kólik kompanııasy 35 myńnan astam avtokólik quralymen (sonyń ishinde tirkemeler/jartylaı tirkemeler) tasymaldardy oryndap keledi. Joǵaryda atalǵandaı otandyq tasymaldaýshylardyń halyqaralyq naryqtaǵy úlesi 50%-ǵa deıin artty (2021 jyly 31% qurady), — dep atalyp ótken vedomstvo aqparatynda.

Sonymen qatar Kólik mınıstrligi Qazaqstanda sheteldik kapıtaldyń qatysýymen júk tasymalynda neshe kólik kompanııasy bar ekenin naqtylady.

— Keıingi onjyldyqta Qazastaqstanda shetel kapıtalynyń qatysýymen (Germanııa, Latvııa, Lıtva, Nıderlandy, Túrkııa, Iran, Italııa, Reseı, Belorýssııa, Pákistan, Grýzııa) birlesken 50 kólik kásiporny tirkelgen jáne olardyń parkinde 1 964 avtokólik bar. Osy birlesken kásiporyndar men olardyń avtokólik quraldary Qazaqstanda tirkelgen, sondaı-aq olar el ekonomıkasyna ınvestıtsııa quıyp, salyq tólep, qosymsha jumys oryndarymen qamtıtyn qazaqstandyq kompanııalar retinde sanalady, — delingen mınıstrlik málimetinde.

Budan buryn habarlanǵandaı, 2025 jyldyń 15 qańtarynan otandyq tasymaldaýshylar úshin júkterdi halyqaralyq tasymaldaýǵa jańa tetik engizildi.