Avtokólikke aı saıyn qansha aqsha jumsalady
ASTANA. KAZINFORM — Avtokólik satyp alýmen shyǵyn bitpeıdi. Janarmaı, saqtandyrý, jóndeý, tehnıkalyq qyzmet kórsetý men turaq aqysy da qaltaǵa salmaq túsiredi. Kazinform tilshisi elimizde eń kóp satylatyn kólikterdiń ishinen bastapqy baǵasy eń arzan jáne eń qymbat eki modeldi tańdap, olarǵa aı saıyn qansha aqsha jumsalatynyn anyqtady.
Qazaqstan avtomobıl odaǵynyń málimetinshe, 2026 jyldyń qańtar-tamyz aılarynda eń kóp satylǵan 20 modeldiń ishinde bastapqy baǵasy eń arzany — JAC S3 Pro. Onyń quny 5 990 000 teńgeden bastalady. Al tizimdegi eń qymbat model — Toyota Camry. Onyń bastapqy baǵasy 18 690 000 teńge. Naqty quny jabdyqtalýyna qaraı ózgeredi.
Osy eki kólikke ketetin shyǵyndy salystyrý úshin Kazinform tilshisi Avtomobıl naryǵyn monıtorıngteý jáne taldaý agenttiginiń bas dırektory Artýr Mıskarıanǵa júgindi.
Sarapshy eki modeldiń shyǵynyn birdeı jaǵdaıda eseptedi. Ol úshin kólikter Astanada aıyna orta eseppen 1 000 shaqyrym, jylyna 12 000 shaqyrym júredi dep alyndy.
Janarmaıǵa qansha aqsha ketedi?
Sarapshynyń esebinshe, JAC S3 Pro 100 shaqyrymǵa orta eseppen 9 lıtr, Toyota Camry 10 lıtr benzın jumsaıdy.
AI-92 benzıniniń lıtri 250 teńge bolsa, JAC S3 Pro-ǵa aıyna shamamen 22 500 teńge, jylyna 270 myń teńge ketedi. Toyota Camry úshin bul shyǵyn aıyna 25 myń, jylyna 300 myń teńgeni quraıdy.
Al lıtri 310 teńge turatyn AI-95 benzınin paıdalansa, JAC S3 Pro-ǵa aıyna shamamen 28 myń, jylyna 335 myń teńge jumsalady. Toyota Camry úshin aılyq shyǵyn 31 myń, jyldyq shyǵyn 372 myń teńgege jetedi.
Artýr Mıskarıan esepte janarmaı shyǵynynyń eń tómengi ortasha kórsetkishteri alynǵanyn eskertti. Kúndelikti paıdalaný kezinde JAC S3 Pro 100 shaqyrymǵa 11-12 lıtr, Toyota Camry 15-16 lıtrge deıin benzın jumsaýy múmkin.
Saqtandyrý men kólik salyǵy
JAC S3 Pro úshin jyldyq kólik salyǵy shamamen 8 myń teńge, Toyota Camry úshin 27 myń teńge.
Al kólik ıeleriniń azamattyq-quqyqtyq jaýapkershiligin mindetti saqtandyrýǵa ár model úshin 54 myń teńgeden eseptelgen.
Saqtandyrý aqysy kóliktiń qaı óńirde tirkelgenine, júrgizýshiniń jasy men ótiline, sondaı-aq burynǵy saqtandyrý jaǵdaılaryna baılanysty ózgeredi. Bul esepke erikti avtosaqtandyrý (KASKO) kirmegen.
Tehnıkalyq qyzmet kórsetý
Artýr Mıskarıannyń esebinshe, jylyna 12 myń shaqyrym júretin JAC S3 Pro-ǵa josparly tehnıkalyq qyzmet kórsetý úshin 120-300 myń teńge qajet. Toyota Camry úshin bul shyǵyn 150-350 myń teńgeni quraıdy.
Naqty soma óndirýshiniń talaptaryna, kóliktiń júrgen jolyna, qajetti materıaldardyń baǵasyna jáne qyzmet kórsetetin ortalyqqa baılanysty.
Qysqy dóńgelek pen ony aýystyrý
JAC S3 Pro-ǵa arnalǵan tórt qysqy dóńgelek shamamen 80-300 myń teńge turady. Toyota Camry úshin 180-450 myń teńge qajet.
Dóńgelektiń baǵasy ólshemine, óndirýshisine jáne satyp alatyn maýsymǵa qaraı ózgeredi.
Al dóńgelekti jylyna eki ret aýystyrý JAC S3 Pro ıesine shamamen 25 myń, Toyota Camry ıesine 35 myń teńgege túsedi.
Kólik jýý men turaq aqysy
JAC S3 Pro kóligin jýýǵa aıyna shamamen 10 myń teńge, jylyna 120 myń teńge ketedi. Toyota Camry úshin bul shyǵyn aıyna 15 myń, jylyna 180 myń teńgeni quraıdy.
Aqyly turaqtardy ara-tura paıdalanýǵa eki model úshin de jylyna shamamen 100 myń teńge qarastyrylǵan.
Jóndeý men qosalqy bólshekter
Jóndeý jumystary men qosalqy bólshekterge de aldyn ala aqsha qarastyrǵan jón.
Sarapshynyń esebinshe, JAC S3 Pro úshin jylyna 50-200 myń teńge, Toyota Camry úshin 80-300 myń teńge qajet bolýy múmkin.
Budan bólek, áınek jýatyn qatpaıtyn suıyqtyq, áınek tazalaǵysh şetkalar men basqa da usaq kerek-jaraqtarǵa qarajat jumsalady. Olarǵa JAC S3 Pro úshin jylyna shamamen 50 myń, Toyota Camry úshin 70 myń teńge eseptelgen.
Jalpy shyǵyn qansha bolady?
Janarmaı, mindetti saqtandyrý, kólik salyǵy, tehnıkalyq qyzmet kórsetý, dóńgelek satyp alý men aýystyrý, kólik jýý, turaq, jóndeý jáne basqa da shyǵyndardy qosqanda, JAC S3 Pro-ǵa jylyna 658 myńnan 1 mln 569 myń teńgege deıin jumsalýy múmkin. Bul aıyna shamamen 55-131 myń teńge.
Toyota Camry úshin jyldyq shyǵyn 818 myńnan 1 mln 999 myń teńgege deıin jetedi. Aıyna shaqqanda 68-167 myń teńge.
Avtosarapshynyń aldyn ala baǵalaýynsha, eki kólikke ketetin jyldyq shyǵynnyń aıyrmasy 200-400 myń teńge bolýy múmkin.
Buǵan qosa KASKO, aqyly joldar, aıyppuldar, kólikti evakýatormen tasymaldaý jáne esepke kirmegen qosymsha jabdyqtarǵa aqsha ketýi múmkin. Eger kólik nesıege satyp alynsa, bankke tólenetin paıyzdar men ózge tólemderdi de eskerý qajet.
Artýr Mıskarıan eki modeldiń aıyrmashylyǵyn da eskertti. JAC S3 Pro men Toyota Camry shanaq túri, jabdyqtalýy, sanaty, kólemi, salmaǵy men baǵasy jaǵynan birdeı emes. Olardyń satyp alýshylary da ártúrli. Sondyqtan bul salystyrýdy qaı kólikti satyp alǵan tıimdi ekenin anyqtaıtyn usynys retinde qabyldaýǵa bolmaıdy.
Buǵan deıin kólik jóndeý qyzmeti qansha turatynyn jazǵan edik.
