Avtokólik óndirisi salasynda 10 myńnan astam adam jumys isteıdi
ASTANA. KAZINFORM — Bul sektorda kadrlyq rezerv qalyptastyrý maqsatynda aýqymdy jumystar atqarylyp jatyr. Bul jóninde Úkimet otyrysynda Ónerkásip jáne qurylys mınıstri Ersaıyn Naǵaspaev málimdedi.
— Salanyń odan ári damýy ınjenerlik áleýeti men bilikti kadrlarǵa tikeleı baılanysty. Osy maqsatta kásiporyndar ınjenerlik quzyretterdi damytýǵa, kadrlyq rezerv qalyptastyrýǵa jáne jańa býyn mamandaryn daıarlaýǵa júıeli túrde ınvestıtsııa salyp jatyr. Bul jumys joǵary oqý oryndary jáne kolledjdermen birlesip, dýaldy oqytý baǵdarlamasy arqyly júzege asyrylyp jatyr, — dedi ol.
Mınıstrdiń sózinshe, sala qyzmetkerlerine áleýmettik qoldaý tetikteri de qarastyrylǵan.
— Óńirlerge mamandardy tartý úshin eńbek jaǵdaıy men áleýmettik qoldaý kórsetý aıasynda, korporatıvtik kampýstar men jataqhanalar salynyp, jumysshy mamandyqtaryna «Naýryz jumysker» turǵyn úı baǵdarlamasy iske qosyldy. Sondaı-aq, kásiporyndar qyzmetkerlerge arnalǵan medıtsınalyq saqtandyrý, tamaqtandyrý, kólikpen qamtamasyz etý jáne basqa da áleýmettik qoldaý sharalaryn keńeıtýde, — dedi ol.
Sonymen birge Ersaıyn Naǵaspaev qazir salada 10 myńnan astam adam jumys isteıtinin atap ótti.
Aıta keteıik, buǵan deıin elde qandaı avtokólik bólshekteri óndiriletinin jazǵanbyz.
