Avtokólik ımporttaý: kedendik rásim men mindetti tólemder
ASTANA. KAZINFORM — Qazaqstanda shetelden avtokólik ákelýge qyzyǵýshylyq áli de joǵary. 2026 jyly jeńil avtokólikterdi ımporttaý jáne kedendik rásimdeý tártibi negizinen ózgerissiz qaldy. Bul materıalda kólik ákelý kezinde qoldanylatyn kedendik tarıfter, qosymsha salyqtar men tirkeýge deıingi negizgi talaptar jan-jaqty túsindiriledi.
Eki túrli kedendik tarıf qoldanylady
Qoldanystaǵy erejege sáıkes, Qazaqstan azamattary avtokólikti el aýmaǵyna eki tarıf boıynsha kirgize alady. Onyń biri — Qazaqstannyń Dúnıejúzilik saýda uıymyna (DSU) qosylǵannan keıin bekitilgen ulttyq kedendik tarıf, ekinshisi — Eýrazııalyq ekonomıkalyq odaqtyń Birtutas kedendik tarıfi.
Kóp jaǵdaıda bul eki tarıftiń mólsherlemeleri bir-birine jaqyn. Alaıda kólik Qazaqstannyń ulttyq tarıfimen tómen mólsherde rásimdelgen bolsa, ony keıin EAEO-nyń basqa memleketterine shyǵarý kezinde biryńǵaı tarıfpen aradaǵy aıyrmany qosymsha tóleý talap etiledi.
Benzındi jáne dızeldi kólikterge — negizinen 15 paıyz
2026 jyly benzınmen júretin jeńil avtokólikterdiń basym bóligi úshin kedendik baj mólsherlemesi 15 paıyz deńgeıinde saqtaldy. Bul talap qozǵaltqysh kólemi 1000 tekshe santımetrden aspaıtyn shaǵyn lıtrajdy kólikterge de, 1000–1500 jáne 1500–3000 tekshe santımetr aralyǵyndaǵy avtokólikterge de qoldanylady.
Jańa avtokólikter men paıdalanylǵan, ıaǵnı 3 jyldan 7 jylǵa deıingi kólikter úshin de osy mólsherleme kúshinde. Al shyǵarylǵanyna 7 jyldan asqan kólikterge paıyzdyq bajben qatar eń tómengi naqty mólsher belgilenedi — qozǵaltqysh kóleminiń ár tekshe santımetrine 0,5–0,6 eýrodan kem emes.
Dızeldi avtokólikterge qatysty talaptar da osyǵan uqsas. Qozǵaltqysh kólemine qaramastan, jańa jáne 3–7 jyl paıdalanylǵan dızeldi kólikter úshin baj mólsherlemesi 15 paıyzdy quraıdy. 7 jyldan asqan dızeldi kólikterge eń tómengi naqty mólsher qoldaný talaby saqtalǵan.
Jolsyz jerde júretin, sondaı-aq qozǵaltqysh kólemi 4200 tekshe santımetrden asatyn avtokólikterge de jalpy alǵanda 15 paıyzdyq mólsherleme qoldanylady.
Elektromobılderge — nóldik baj
Memleket ekologııalyq taza kólik túrlerin yntalandyrý saıasatyn jalǵastyryp keledi. Osyǵan baılanysty 2026 jyly elektromobılder men tizbekti gıbrıdter (EREV) úshin ımporttyq kedendik baj mólsherlemesi nól deńgeıinde qaldy.
Tizbekti gıbrıdterde ishten janý qozǵaltqyshy tek elektr qýatyn óndirýge arnalǵan generator retinde jumys isteıdi, al kólik tolyqtaı elektr qozǵaltqyshymen qozǵalady.
Kedendik rásimdeý tek bajben shektelmeıdi
Avtokólikti ımporttaý kezinde tólenetin shyǵyndar tek kedendik bajben ǵana shektelmeıdi. Baj esepteletin kedendik qunǵa kóliktiń ınvoısta kórsetilgen baǵasymen qatar, ony jetkizý, tıeý-túsirý jáne saqtandyrý shyǵyndary da kiredi.
Sonymen qatar, 2026 jyly árbir avtokólik úshin kedendik rásimdeý alymy retinde 6 aılyq eseptik kórsetkish, ıaǵnı 25 950 teńge tólenedi.
Kedendik tazartý kezeńinde 16 paıyzdyq qosylǵan qun salyǵy da alynady. Bul salyq baj ben basqa shyǵyndardy qamtıtyn tolyq kedendik qunnan esepteledi. Eger keden organdary ınvoısta kórsetilgen baǵany tómendetilgen dep tapsa, esepteý memlekettik kirister organdarynyń baǵalyq katalogyna sáıkes júrgizilýi múmkin.
Kedennen keıin de mindetti tólemder bar
Kedendik rásimder aıaqtalǵannan keıin avtokólik Qazaqstanda tirkeýge qoıylar aldynda ýtılızatsııalyq alym tólenýi tıis. Tólem rastalǵan soń, ıesi arnaıy halyqqa qyzmet kórsetý ortalyǵyna baryp, alǵashqy tirkeý, tehnıkalyq pasport jáne memlekettik nómir alý rásimderinen ótedi.
Qozǵaltqysh kólemi 3000 tekshe santımetrden asatyn avtokólikter úshin aktsız salyǵy qarastyrylǵan. Onyń mólsheri — ár tekshe santımetrge 100 teńge. Bul salyq kólik ákelingen aıdan keıingi aıdyń 20-synan keshiktirilmeı tólenýi qajet.
Al satyp alý quny 18 myń aılyq eseptik kórsetkishten, ıaǵnı 2026 jyly 77,85 mıllıon teńgeden asatyn avtokólikterge qosymsha 10 paıyzdyq arnaıy aktsız salyǵy salynady.
Tehnıkalyq talaptar qatań saqtalady
Qazaqstanda alǵash ret tirkeýge qoıylatyn avtokólikter birqatar tehnıkalyq talaptarǵa saı bolýy tıis. Atap aıtqanda, kólik sol jaq rýldi bolýy, ekologııalyq standarty Eýro-4-ten tómen bolmaýy, ABS júıesimen, júrgizýshi qaýipsizdik jastyǵymen, SOS shuǵyl shaqyrý túımesimen, ISOFIX balalar oryndyǵyn bekitý júıesimen jáne kúndizgi júris shamdarymen jabdyqtalýy qajet.
Avtokólik ımporttaýdy josparlaǵan azamattarǵa barlyq shyǵyndy aldyn ala eseptep alǵany jón. Kedendik baj, QQS, ýtılızatsııalyq alym, aktsız jáne tirkeý shyǵyndary eskerilmese, avtokóliktiń túpkilikti baǵasy bastapqy mejeden edáýir joǵary bolyp ketýi múmkin.