Avtokólikti tehnıkalyq baıqaýdan ótkizý: jalǵan kýálikter tekseriledi

ASTANA. QazAqparat – Premer-Mınıstr Álıhan Smaıylov avtokólikti tehnıkalyq baıqaýdan durys ótkizbegen ortalyqtarǵa qatysty jaýapkershilik kúsheıtiletinin málim etti, dep habarlaıdy QazAqparat tilshisi.

«Mindetti tehnıkalyq baıqaý salasynda jaýapkershilikti kúsheıtý maqsatynda tıisti kodekske ózgerister engizilip jatyr», - dep jazdy Álıhan Smaıylov depýtattyq saýalǵa bergen jaýabynda.

Onyń aıtýynsha, avtokólikti qaramaı, onyń jabdyqtaryn teksermeı ruqsat qujatyn berý derekteri erekshe baqylaýda bolady.

Osy oraıda, tehnıkalyq baıqaýdan jalǵan kýálik alýǵa tyrysqan avtokólik ıeleri de jaýapqa tartylady, ıaǵnı aıyppul salý qarastyrylady. Sonymen qatar, osyndaı áreketter anyqtalǵan jaǵdaıda, «Tehnıkalyq baıqaý» biryńǵaı aqparattyq júıesiniń operatoryna qatysty jaýapkershilik máselesi pysyqtalyp jatyr.