Avtokólikti onlaın qalaı tirkeýge bolady
26 naýryzdan bastap elimizde Halyqqa qyzmet kórsetý ortalyqtary men mamandandyrylǵan HQO-lar jumysyn toqtatty.
Azamattar memlekettik qyzmetterdi tek Elektrondyq úkimet portalynda ala alady.
«Mamandandyrylǵan HQO-lar jabylǵannan keıin azamattar arasynda portal arqyly kólik quraldaryn qaıta tirkeý qyzmeti suranysqa ıe bolmaıdy dep boljaǵan edik. Sebebi áli de kóbisi kólikti avtoHQO-da tirkeýdi jón kóredi. Biraq statıstıka kórsetkendeı, qazaqstandyqtar tótenshe jaǵdaı kezinde de kólik satyp alyp, ony ózdiginen qaıta tirkeýge qoıa alady», – dedi «Azamattarǵa arnalǵan úkimet» memlekettik korporatsııasynyń basqarma tóraǵasy Ásemgúl Baltasheva.
Kólikterdi qaıta tirkeý qyzmeti egov.kz portalynda «Kólik jáne kommýnıkatsııalar» bóliminde qoljetimdi. Ony onlaın rejıminde alý úshin satýshy ETsQ-ny paıdalanyp, egov.kz portalyna kiredi. Satylatyn kólik týraly aqparatty engizip, aıyppuldar men salyqtar boıynsha bereshekti tekserýge suranys jiberedi. Eger qaryz bar bolsa, ony elektrondyq úkimet portaly arqyly tólep, ótinishke ETsQ-men qol qoıady. Osydan keıin satyp alýshy Elektrondyq úkimet portalyndaǵy jeke kabınetinde ótinishpen tanysa alady. Onda aıyppuldardy tekserip bolǵannan keıin memlekettik nómir jáne tehpasport úshin tıisti alymdar men tirkeý jarnasyn tóleýi tıis. Satyp alýshy mámileni óziniń elektrondyq tsıfrlyq qoltańbasymen rastaıdy. Keıin avtoHQO-ǵa tek daıyn bolǵan nómir men tehnıkalyq tólqujatty alyp ketý úshin barady.
