Avtokólikti qaıta tirkeýde kezinde memlekettik tirkeý nómirin saqtaý protsesi avtomattandyryldy
NUR-SULTAN. QazAqparat - Elimizde avtokólikti qaıta tirkeý kezinde memlekettik nómirdi saqtaý protsesi avtomattandyryldy. Bul jaıynda QR Tsıfrlyq damý, ınnovatsııa jáne aeroǵarysh ónerkásibi mınıstri Asqar Jumaǵalıev Facebook paraqshasynda jazdy, dep habarlaıdy QazAqparat tilshisi.
«Sizder tótenshe jaǵdaı kezinde 4,5 myńnan astam azamattyń óz avtokóligin portal arqyly rásimdegenin estigen bolarsyzdar. Biraq, rásimdeı almaǵandary da bar. Sebebi, olar kóligin satqannan keıin, memlekettik nómirdi óz atynda saqtap qalǵylary keldi. Árıne, bul - azamattardyń óz qalaýy. Keıbirine tsıfrlardyń kombınatsııasy unaýy múmkin. Osy máseleni tsıfrlyq komıssarlar da kótergen edi. Tipti, bir azamattyń 362 nómirin óz atynda qaldyrǵysy keletini týraly maǵan hat jazǵany esimde. Ol turyp jatqan aımaqta bul san kıeli sanalady eken jáne ony tumaryndaı kórse kerek», - dep jazdy mınıstr.
Asqar Jumaǵalıev azamattardyń usynys-pikirlerin QR Іshki ister mınıstrligindegi áriptesterine jetkizgendigin atap ótedi.
«Olar «Ulttyq aqparattyq tehnologııalar« AQ-men birlesip, avtokólikti qaıta tirkeý kezinde nómirdi saqtaý protsesin avtomattandyrdy. Buryn bul protsess mamandandyrylǵan HQKO-da qaǵaz túrinde júrgiziletin, azamattyń nómirdi óz atynda qaldyratyny týraly jazǵan ótinishin HQKO qyzmetkerleri ІІM Ákimshilik polıtsııa komıtetine joldap otyrdy. Keshe osy servısti testileýge qatystym. Búgin iske qostyq. Endi kóligińizdi portal arqyly esepten shyǵarý kezinde «memlekettik tirkeý nómirlik belgisin saqtaý« sóziniń janyna belgi qoısańyz boldy, memlekettik nómir ózińizde qalady», - dedi ol.
