Avtokólikti qaıta tirkeý: Onlaın qyzmetti paıdalanǵandar 100 myńnan asty

NUR-SULTAN. QazAqparat – «Azamattarǵa arnalǵan úkimet» memlekettik korporatsııasynyń qoǵammen baılanys departamentiniń basshysy Murat Jumanbaı tsıfrlandyrýdyń arqasynda memlekettik qyzmetti alý jeńildeı túskenin aıtyp berdi, dep habarlaıdy QazAqparat tilshisi.

«Ózderińiz biletindeı, memlekettik qyzmetti elektrondy formatqa aýystyrý isine qatty kóńil bólip kelemiz. Máselen, keıingi bir jarym jylda mamandandyrylǵan HQO-ǵa baryp, ýaqyt joǵaltpaı, egov.kz portaly arqyly avtokólikti esepke qoıyp, júrgizýshi kýáligin aýystyrýǵa bolady. Álbette, kez kelgen jańashyldyqty adamdar áý basta birden qabyldaı qoımaıtyny anyq. Alaıda, Qazaqstanda egov.kz portaly arqyly memlekettik qyzmetti alatyn avtokólik ıeleriniń sany ondaǵan ese artqanyn aıta ketý kerek», - deıdi Murat Jumanbaı.

Onyń jazýynsha, 2019 jyly onlaın tártippen resimdelgen júrgizýshi kýáliginiń sany 8 ese, al onlaın tártipte qaıta tirkelgen avtolardyń sany 20 ese artqan.

«2018 jyly júrgizýshi kýáligin 19 409 qazaqstandyq onlaın tártipte resimdese, 2019 jyly 153 myń adam resimdegen. 2018 jyly elektrondy tártip boıynsha 5 myń adam kóligin qaıta tirkese, olardyń sany byltyr 100 myńnan asyp ketken», - deıdi ol.