Avtokólikterdiń tehnıkalyq baıqaýdan ótkendigi týraly jalǵan qujat jasaýshy ustaldy
ASTANA. Qazannyń 20-sy. QazAqparat /Marlan Jıembaı/ - Avtokólikterdiń tehnıkalyq baıqaýdan ótkendigi týraly jalǵan qujat jasaýshy quryqtaldy. Bul týraly QR ІІM resmı ókili Qýanyshbek Jumanov búgin elordada ótken baspasóz máslıhaty barysynda málim etti.
Resmı ókildiń atap ótýine qaraǵanda, Qaraǵandy oblysynyń polıtsııa bólimine belgisiz bireýdiń kólikterdi tehnıkalyq baıqaýdan ótkizgeni týraly qoldan jasalǵan kýálikterdi satýmen aınalysatyny týraly aqparat kelip túsken. Sol kúni Uıymdasqan qylmysqa qarsy kúres basqarmasynyń qyzmetkerleri jedel-izdestirý sharalaryn júrgizip, nátıjesinde 25 jastaǵy jergilikti turǵyndy quryqtaǵan. Odan avtomashınalardyń tehnıkalyq baıqaýdan ótkeni týraly qoldan jasalǵan 7 kýálik tárkilengen.
«Alynǵan talondar sot-krımınalıstıkalyq saraptamaǵa jiberilip, qylmystyq is qozǵaý máselesi sheshilýde», dedi ol.
