Avtokólikterdiń qysqy dóńgelekteri joldardyń buzylýyna áser etpeıdi - QazAvtoJol
ASTANA. QazAqparat – Budyrly shegesi bar qysqy dóńgelekter joldardyń buzylýyna áser etip otyrǵan joq. Bul týraly «QazAvtoJol» UK» AQ Basqarma tóraǵasy Meıirhat Qasymbaev málim etti, dep habarlaıdy QazAqparat tilshisi.
Búgin Ortalyq kommýnıkatsııalar qyzmetindegi baspasóz máslıhatynda tilshiler QazAvtoJol basshysynan budyrly shegesi bar qysqy dóńgelekter joldardyń buzylýyna qanshalyqty áser etetini týraly suraq qoıdy.
Bul turǵyda M. Qasymbaev atalǵan qysqy dóńgelekterdiń jol sapasyna áser etedi degen tujyrym shyndyqqa janaspaıtynyn aıtty.
«Bul dóńgelekter álemdik standarttar boıynsha jasalady jáne joldyń sapasyna qatysy joq. Osy oraıda, tıisti ǵylymı zertteýler bolǵan, soltústiktegi elderde paıdalanyp jatyr», - dedi kompanııa basshysy.
Bul rette ol osyǵan deıin elimizde budyrly shegesi bar qysqy dóńgelekter joldardyń buzylýyna aıtarlyqtaı áser etedi degen qısynsyz másele kóterilgenin aıtty. Sondyqtan mundaı dóńgelekterdi paıdalanýǵa shekteý qoıý josparda joq.
«Elimizde joldardy júkti shamadan tys artyq tıep alǵan júk kólikteri buzyp jatyr. Bul kólikterge ruqsat etilgen norma bar, alaıda kólik júrgizýshileri bul talapty oryndamaı jatyr», - dedi Meıirhat Qasymbaev.
