Avtokólikterdiń eń tanymal tústeri anyqtaldy
ASTANA. QazAqparat - 2014 jyly avtomobılder úshin aq tús álemdegi eń tanymal tús boldy. Ekinshi orynǵa qara tústi kólikter shyqty. Birinshi bestikke sondaı-aq sur, qońyr jáne qyzyl túster kirdi. Mundaı málimetterdi óziniń zertteýinde kólik shyǵarýshylarǵa lak-boıaý materıaldarynyń iri jetkizýshisi PPG Industies kompanııasy jarııalady.
Sarapshylar aq tústi kólikter erekshe tanymal bolyp júrgenin atap ótti. Ótken jyldyń qorytyndylarymen salystyrǵanda, osyndaı kólikterdiń sany úsh paıyzǵa artty. Bul rette kúmis tústi kólik quraldary avtomobılshilerge kóp unaı qoımaıtyny anyqtaldy: ótken eki jyl boıynsha olardy unatý deńgeıi jeti paıyzǵa tómendegen.
PPG Industies mamandarynyń boljamynsha, 2015 jyly tabıǵı boıaý túrleri, mysaly, qońyr jáne sarǵylt túster erekshe tanymal bolady. Metall tústes tústerge boıalǵan kólikterge (qalaıy, qola, altyn jalatylǵandaı túster) de suranystyń artýy kútilýde.
Sońǵy atalǵan tústerdiń tanymaldylyǵy osyndaı tústerdiń zergerlik buıymdarda, jıhaz jáne ónerkásip dızaınynda jıi kezdesýimen túsindiriledi.
Esterińizge sala keteıik, 2013 jyly da kólikqumarlar arasynda aq tús eń tanymal tús bolǵan. Onyń úlesi barlyq avtomobılderdiń 25 paıyzyn qurady. Ekinshi oryndy (19 paıyzdan) kúmis tústes jáne qara tústi kólikter alsa, sur tústi kólikterdiń úlesi 12 paıyzdy quraǵan.
