Avtokólikterdi tehnıkalyq baıqaýdan ótkizý tártibin qaıta qarastyrý kerek - agenttik

NUR-SULTAN. QazAqparat - Kólikterdi tehnıkalyq baıqaýdan ótkizý tártibin qaıta qarastyrý kerek. Bul týraly QR Sybaılas jemqorlyqqa qarsy is-qımyl agenttigi ǵımaratynda ótken brıfıngte Sybaılas jemqorlyqqa qarsy saıasat departamentiniń dırektory Danııar Sabyrbaev málim etti, dep habarlaıdy QazAqparat tilshisi.

«Búginde iske asyrylyp jatqan tehnıkalyq baıqaýdan bas tartýdyń qajettigi logıkasyna túsinik bergim keledi. Qazirgi kezde tehnıkalyq baıqaý sharalary bastapqyda júktelgen qyzmetterdi oryndamaı jatqanyn moıyndaý kerek. Bizdiń oıymyzsha, atalǵan baıqaý ádil ári ashyq bolýy úshin jalpy tujyrymdy ázirlegenshe, ókiletti organdarǵa bul máseleni sheshý kerek. Sonymen qatar, azamattyq-qoǵamdyq talqylaý qajet», - dedi D. Sabyrbaev.

Onyń paıymynsha, shyn máninde tehnıkalyq baıqaý eshbir negizi joq nemquraıly sharaǵa aınaldy. Sondyqtan tehnıkalyq baıqaý sharalaryn qaıta qarastyrý kerek.

«Biz tehnıkalyq baıqaýdy sapaly júrgizýdiń tetigi daıyndalǵansha, ony ýaqytsha toqtata turýdy usynamyz. Osy oraıda ókiletti organmen, qoǵammen, «Atameken» UKP-men bul taqyrypty talqylaýdy bastaýdy suraımyz. «Qazirgi kúıdegi tehnıkalyq baıqaý bizge kerek pe?» degen saýalǵa jaýap berýimiz kerek. Sarapshylardyń pikirinshe, búginde júrgizilip jatqan tehnıkalyq baıqaýdyń jaǵdaıy qoǵamdyq qaýipsizdik turǵysynda qaterli. Bul rette agenttiktiń ustanymyna toqtalsaq, tehnıkalyq baıqaý stansasynan ótý formatyn qaıta qarastyrý kerek», - dep túıdi D. Sabyrbaev.

Óz kezeginde «Adaldyq alańy» respýblıkalyq jobalyq keńsesiniń jetekshisi Mıras Qarǵabaı bul salada júrgizilgen monıtorıngtiń qortyndysyn jarııalady.

Almaty oblysy boıynsha kóliktik qadaǵalaý ınspektsııasymen birlese júrgizilgen shara barysynda «vatsap arqyly tehnıkalyq baıqaý» sııaqty zańsyz qyzmet túrleri anyqtaldy. Atalǵan fakti Taldyrqorǵan qalasynda tirkeldi. ıAǵnı kólikti tıisti orynǵa kirgizbesten, 6 myń teńgege tehnıkalyq kartany alý múmkindigi jasalǵan.

Munymen qosa ol Aqmola oblysynda Qazaqstan Respýblıkasynan tys jerlerde tirkelgen avtokólikterdi zańsyz tehnıkalyq baıqaýdan ótkizý oqıǵalary anyqtalǵanyn aıtty.

Respýblıkalyq «Ystyq shilde» aktsııasy sheńberinde shetelde tirkelgen avtokólikterdi tehnıkalyq baıqaýdan ótkizý týraly talondardy zańsyz ázirleý qyzmetteriniń habarlandyrýlary ornalastyrylǵan saıttarǵa monıtorıng júrgizý barysynda «Tehosmotr RF», «Tehosmotr Armenııa, Kırgızııa ı Rossııa v Kokshetaý» sııaqty habarlandyrýlar anyqtaldy. Barlyǵy «OLX» saıtynda osyndaı qyzmetterdi usynatyn 32 habarlandyrý jarııalanǵan.