Avtokólikterdi tehbaıqaýdan ótkizýge bir jyldyq moratorıı engizý kerek - V. Rogalev
ASTANA. 22 aqpan. QazAqparat - Avtokólikterdi mindetti tehnıkalyq baıqaýdan ótkizýge bir jyldyq moratorıı engizý kerek.
Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Vıktor Rogalev osy máseleni kóterdi.
Óz saýalynda depýtat aǵymdaǵy jyldyń 1 qańtarynan bastap kóptegen kólik ıeleriniń avtokólikterin tehnıkalyq baıqaýdan ótkizý barysynda qıynshylyqtarǵa tap bolǵanyn atap ótti.
«Búgingi kúni kólik ıeleriniń barlyǵy birdeı avtokólikterin óz ýaqytynda tehnıkalyq baıqaýdan ótkize almaıtyn bolyp otyr. Óıtkeni respýblıka aýmaǵynda mamandandyrylǵan stansalar jetkiliksiz. Júrgizýshilerge júzdegen shaqyrym júrip, ýaqyty men qarajatyn shyǵyndaı otyryp, arnaıy stansalary bar qalalardan tehnıkalyq baıqaý ótkizýge týra keledi», - deıdi V. Rogalev. Onyń aıtýynsha, oryn alǵan problemalardy sheshý maqsatynda birqatar sharalardy zańnamalyq deńgeıde qamtý qajet. Máselen, depýtat jańa avtokólikter ıelerine onyń shyǵarylǵan merziminen bastap úsh jyl boıyna eshqandaı tehbaıqaýdy mindettemeý kerektigin alǵa tartady. Al odan keıingi jyldary tehnıkalyq baıqaýdyń eki jylda bir ret ótkizilgeni oryndy.
«Tehnıkalyq baıqaýdy ótkizý barysynda oryn alǵan problemalyq jaǵdaılarǵa baılanysty bir jyl boıyna avtokólikter ıeleri úshin mindetti tehnıkalyq baıqaý ótkizýge moratorıı engizilse. Kólik jáne kommýnıkatsııa mınıstrligine el aýmaqtarynda mamandandyrylǵan tehnıkalyq baıqaý stansalaryn tolyq qamtamasyz etý sharalaryn júkteý qajet. Tehbaıqaý barysynda sybaılas jemqorlyqqa jol berý nemese stansa ıegerleri arasynda mámilelesý faktilerin de boldyrmaý kerek», - deıdi V. Rogalev.
