Avtokólikpen jolaýshylar tasymaly kásiporyndaryna qandaı qoldaý sharalary kerek

NUR-SULTAN. QazAqparat – Jolaýshylar tasymalymen aınalysatyn avtokólik kásiporyndarynyń janar-jaǵarmaı boıynsha shyǵyndaryn óteý kerek. Bul týraly «Atameken» UKP-nyń alańynda ótken onlaın talqylaý barysynda QR Avtokólikshiler odaǵynyń bas dırektory Sábıt Amanbaev málim etti, dep habarlaıdy QazAqparat tilshisi.

Onyń sózine qaraǵanda, el azamattarynyń qozǵalysyn qamtamasyz etýde avtokólik arqyly jolaýshylar tasymaly salasy óz mindetterin oryndap keledi. Degenmen, tótenshe jaǵdaı kezeńinde barsha óńirler boıynsha jolaýshylar tasymaly aǵyny ortasha eseppen alǵanda on esege tómendedi. Sondyqtan tasymaldaýshylar úshin kúrdeli jaǵdaı týyndap otyr.

«Eger de osylaı jalǵasa berse, onda sýbsıdııalaý sharalary eskerilmegen óńirlerde, sondaı-aq kásiporyndardyń tólem qabileti jáne qarjylyq jaǵdaıy kemshin jerlerde otyn satyp alý qıyndaýy múmkin. Munymen qosa, tehnıkaǵa tıisti jóndeý sharalaryn júrgizý qıyndaı túsedi, sáıkesinshe kólik baǵdarlaryn qamtamasyz etý múmkin bolmaıdy», - dedi S. Amanbaev.

Osy oraıda jergilikti atqarý organdar tarapynan tıisti qoldaý kerektigin aıtty.

«Sondyqtan da Úkimet tarapynan tıisti sharalar qabyldanýyn kóterip otyrmyz. Bul turǵyda jergilikti atqarýshy organdar kásiporyndardyń otyn men júrgizýshiler eńbekaqysy boıynsha shyǵyndaryn óteýi týraly qadamdardy eskergen durys dep sanaımyz. Sonymen qatar, bıylǵy jyly avtokólik kásiporyndaryn kólik jáne eńbekaqy salyqtarynan bosatýdy surap otyrmyz», - dedi QR Avtokólikshiler odaǵynyń bas dırektory.