Avtokólikpen saıahattaý arzanǵa túsetin elder anyqtaldy
ASTANA. QazAqparat - Brıtandyq The Daily Mail basylymy avtokólikpen saıahattaý asa tıimdi bolatyn Eýropa elderiniń reıtıngin jarııalady. Ony qurý barysynda sol elderdegi janarmaı quny men kólikti jaldaý baǵasy eskerildi.
Kólikpen saıahattaýdy unatatyndar úshin eń arzanǵa túsetin el Ispanııa bolyp shyqty. Bul elde 1 lıtr janarmaı quny orta eseppen 1,4 eýrony quraıdy, al mashınany bir aptaǵa jalǵa alý 78 eýroǵa túsedi. Odan keıingi oryndaǵy Portýgalııada janarmaı quny - 1,6 eýro, kólik jaldaý 83 eýrodan bastalady. Úshinshi oryndy Ulybrıtanııa alady, onda janarmaı baǵasy - 1,6 eýro, avtomobıl jaldaýdyń aptalyq quny - 126 eýro. Al bul turǵydan alǵanda eń qymbat el Norvegııa bolyp shyqty. Onda 1 lıtr janarmaı 1,9 eýro turady, al kólikti bir aptaǵa 315 eýroǵa jaldaısyz. Nıderlandy men Italııa da sáıkesinshe janarmaı quny 1,8 eýro, al kólik jaldaý 178 jáne 166 eýrony qurady, dep habarlaıdy autonews.ru.
