Avtokólikke VIP memlekettik nómirdi endi ınternetten tańdaýǵa bolady

ASTANA. QazAqparat - Qazaqstandyqtar úshin suranysqa ıe qyzmetterdiń biri «bedeldi» nómirlerdi satyp alý bolyp otyr. Ótken jyly avtokólik ıeleri shamamen 6 mlrd teńgege VIP-nómirler satyp alǵan, – dep habarlaıdy QazAqparat Polisia.kz saıtyna silteme jasap.

Osyndaı nómirlerdi satyp alýdy qoljetimdi etý úshin ІІM olardy tańdaý jáne brondaý boıynsha tıisti servıs ázirledi. Bul servıs Tsıfrlyq damý mınıstrliginiń «Smart Bridge» servıster vıtrınasynda ornalastyrylǵan. Servıs memlekettik qyzmetterdi kórsetýge arnalǵan barlyq ıntegratsııalyq platformalarda, onyń ishinde ekinshi deńgeıli bankterdiń mobıldi qosymshalarynda da qoljetimdi. Sonymen qatar azamattarǵa yńǵaıly bolý úshin aqparattandyrý salasyndaǵy ýákiletti organ osy qyzmetti eGov.kz elektrondyq úkimet portalyndaǵy jeke kabınetterge shyǵarý máselesin pysyqtap jatyr. Ótken jyldardaǵy taldaý kórsetkendeı, bul jyl saıyn 20 myńnan astam azamatqa mobıldi qosymshalar arqyly, HQKO-ǵa barmaı-aq, avtokólikterdi tirkeý kezinde onlaın-rejımde «bedeldi» nómirlerdi tańdaýǵa jáne brondaýǵa múmkindik beredi.

ІІM memlekettik qyzmetterdi kórsetý sapasyn arttyrý jáne protsesterdiń ashyqtyǵyn qamtamasyz etý boıynsha jumysty jalǵastyrýda.