Avtokólik joldary sapasyn baqylaýdy kúsheıtýge baǵyttalǵan keshendi jospar bekitildi

NUR-SULTAN. QazAqparat – Avtomobıl joldaryn salý sapasyn baqylaýdy kúsheıtýge baǵyttalaǵan keshendi jospar ázirlendi. Bul týraly Indýstrııa jáne ınfraqurylymdyq damý mınıstrligi baspasóz qyzmetinen málim boldy, dep habarlaıdy QazAqparat tilshisi.

«Jalpy avtojol salasyna qatysty birqatar problema bar. Máselen, jol qurylysy materıaldarynyń tapshylyǵy jáne olardyń qymbattaýy, memleket tarapynan bólingen qarajattyń azdyǵy jáne taǵy basqa túıtkilderdi atap ótýge bolady», - delingen mınıstrliktiń QazAqparat agenttigine bergen jaýabynda.

Osy atalǵan máselelerge baılanysty jobanyń smeta qujattamasy qunynyń ósýi baıqalyp otyr. Saldarynan jobany iske asyrý merzimderi uzaryp keledi.

«Osy oraıda avtomobıl joldaryn jóndeý jáne salý sapasyn baqylaýdy kúsheıtý, jol-qurylysy salasyndaǵy problemalardy joıý maqsatynda mınıstrlik halyqaralyq tájirıbelerge, ǵylymı ári praktıkalyq usynymdarǵa taldaý jasady. Bul turǵyda «Keshendi jospar» ázirlendi jáne qujatty Premer-Mınıstrdiń birinshi orynbasary Roman Sklıar bekitti», - dep jazylǵan vedomstvo málimetinde.

Aıta keteıik, bıyl 14 shilde kúni ótken Úkimettiń keńeıtilgen otyrysynda Memleket basshysy elimizdiń joldary nashar ekeni jáne jol qurlysy salasyn jemqorlyq jaılaǵany týraly aıtty.