Avtokólik úshin adam óltirgen qylmyskerler quryqtaldy - QR ІІM
ASTANA. Qańtardyń 13-i. QazAqparat /Arman Asqarov/ - Astana qalasy ІІD-niń qyzmetkerleri ótken jyldyń 12 qarashasynda «Toıota Lend-Krýzer 200» avtomashınasymen iz-túzsiz joǵalyp ketken 39 jastaǵy elorda turǵynyn óltirý faktisine qatysty qylmysty ashty.
Bul týraly búgin ótken aptalyq brıfıng barysynda QR ІІM Til saıasaty jáne aqparat departamentiniń bastyǵy Qýanyshbek Jumanov aıtty, dep habarlaıdy QazAqparat.
Onyń málimdeýinshe, avtokólik ıesiniń denesi «Astana-Kókshetaý» tas jolynyń aýmaǵynan tabyldy. Osydan keıin polıtsııa qyzmetkerlerine Astana qalasynda bir jas qyzdyń «Lend Krýzer» avtomashınasyn odan markasy tómen avtokólikpen qosymsha aqyǵa aıyrbastaıtyny týraly jedel aqparat kelip tústi. Astanadaǵy notarıaldy keńselerdiń birinde avtokólikti aıyrbastaýdy rásimdeý kezinde Ońtústik Qazaqstan oblysynyń azamatshasy jáne elordanyń bir turǵyny ustaldy. «Búgingi tańda qylmysty uıymdastyrýshy bolyp tabylatyn buryn sottalǵan azamat anyqtalyp, qolǵa tústi. Ol budan buryn ustalǵan adamdarmen birlesip, kisi óltirgenin moıyndap otyr», - deıdi Q.Jumanov.
