Avtokólik tonaýmen aınalysyp kelgen Almaty oblysynyń eki turǵyny quryqtaldy
ALMATY. Qańtardyń 12-si. QazAqparat / Ádilet Musahaev / - Almaty polıtseıleri avtokólikti tonaýmen aınalysyp kelgen Almaty oblysy Іle aýdanynyń 26 jasar turǵyndaryn quryqtady,
dep habarlaıdy QazAqparat ІІD baspasóz qyzmetine silteme jasap.
Bozbalalar kezekti bir qylmysty qańtardyń 10-y kúni jaıma bazadyń janynda jasaǵan. «Folksvagen Passat» kóliginiń qulpyn buzyp, ishindegi magnıtolasyn jymqyryp ketken. Kólik ıesi tonalǵanyn baıqaı salysymen, polıtseıge habarlasady. Birneshe mınýttan keıin oqıǵa bolǵan orynda «Boran» sholǵynshy ekıpajy qyzmetkerleri jumysqa kirisedi. Jedel izdestirý sharalary nátıjesinde polıtseıler eki kúdiktini ustaıdy. Polıtsııa avtokóligin kóre salysymen qylmyskerler boı tasalaýǵa asyǵady, degenimen uzaqqa bara almaǵan.
Kúdiktilerdi kýágerler kózinshe tekserý barysynda polıtsııa qyzmetkerleri ustalǵandardan 3 avtomagnıtola tapty. Onyń bireýi oqıǵa ornynda bolǵan "Folksvagen Passat" avtokóliginiń júrgizýshisi birden óziniki ekenin aıtty. Tergeý barysynda kúdikti azamattar sol kúni tańerteń taǵy eki kóliktiń ishine túskenderin moıyndady. Olar sol kúni "Folksvagen" jáne "Nıva" mashınalarynyń esigin syndyryp avtomagnıtolalaryn alyp ketken. 26 jastaǵy urynyń aıtýynsha: olar Almaty qalasyna avtokólik tonap kúneltýge kelgen. Ustalǵan ekeýi de buryn qylmystyq jaýapkershilikke tartylmaǵan. Qazir quqyq qorǵaýshylar kúdiktilerdiń basqa da qylmystarǵa qatysy bar- joǵyn anyqtap jatyr. Olardyń ústinen qylmystyq is qozǵalyp, tergeý jumystary júrgizilýde.
