Avtokólik, páter kiltteri jáne syıaqy: Altaı Kólginov polıtseılerdi quttyqtady
Nur-Sultan qalalyq Polıtsııa departamenti baspasóz qyzmetinen málim etkendeı, vedomstvo parki elimizde qurastyrylǵan «Hyundai Elantra» jáne «Hyundai Tucson» markaly 30 avtokólikpen tolyqty. Jyl sońyna deıin taǵy 11 avtokólik tapsyrylady. Máselen, ótken jyly ǵana elordalyq polıtsııa avtoparki 65 jańa mashınamen tolyqqan bolatyn. Qyzmettik avtokólikter patrýldik polıtsııa polkine, mamandandyrylǵan batalonǵa jáne ýchaskelik polıtsııa ınspektorlaryna berildi.
«Qurmetti polıtsııa qyzmetkerleri, sizderdi kásibı merekelerińizben shyn júrekten quttyqtaımyn! Sizderge qala turǵyndarynyń tynyshtyǵy men qaýipsizdigin, kóshelerdegi tártipti qamtamasyz etýmen baılanysty úlken jaýapkershilik júkteledi. Búginge deıin myńdaǵan adamnyń ómirin qaýipten arashalap qaldyńyzdar!
Pandemııa kezinde de aldyńǵy shepte eńbek ettińizder: kúzet beketterinde kezekshilikte bolyp, qalanyń úzdiksiz jumysyn qamtamasyz ettińizder. Monıtorıngilik toptardyń quramynda bolyp, sanıtarlyq talaptardyń buzylýynyń aldyn alyp, koronavırýstyń taralmaýyna baǵa jetpes úles qosyp kelesizder.
El basshylyǵynyń tapsyrmasy boıynsha sizderge qolaıly jaǵdaılar jasaý úshin jumys isteımiz», - dedi elorda ákimi Altaı Kólginov.
Sonymen qatar, qyzmettik mindetterin adal atqarǵan jáne erekshe kózge túsken polıtsııa qyzmetkerlerine qala basshysy alǵyshattar tabys etti. Olardyń arasynda ýchaskelik polıtsııa ınspektorlary, patrýldik polıtseıler, tergeýshiler men anyqtaýshylar bar.
