Avtokólik bólshekteri óndirisiniń otandyq klasterin qurý múmkindigi talqylandy

QOSTANAI. QazAqparat – Qazaqstanda avtokólik bólshekteri óndirisin jolǵa qoıý boıynsha naqty múmkindikter jasalǵan. Qostanaı qalasynda ótken semınar-keńeske qatysýshylar osyndaı ortaq pikirge keldi, dep habarlaıdy QazAqparat Indýstrııa jáne ınfraqurylymdyq damý mınıstrliginiń baspasóz qyzmetine silteme jasap.

Semınardyń negizgi taqyryby – Qazaqstan aýmaǵynda otandyq avtomobıl jasaý úshin komponentter óndirisin jolǵa qoıý perspektıvalary. Qatysýshylar sorý júıeleri, symdar, oryndyqtar, elektrondy komponentter, avtomobıl plastmassasyn quıý, avtomobıl bolaty jáne shanaq panelderin shtamptaý sııaqty ártúrli komponentter óndirisin uıymdastyrý múmkindikterin talqylady.

Qazaqstandyq damý ınstıtýttarynyń, onyń ishinde «Báıterek» AQ, «Damý» Qory jáne ónerkásipti damytý qorynyń ókilderi otandyq óndirýshilerdi qoldaýdyń qoldanystaǵy jáne josparlanǵan memlekettik quraldary týraly habardar etti.

Іs-shara sońynda semınarǵa qatysýshylar Qazaqstan Respýblıkasynyń aýmaǵynda avtokomponentter óndirisin jolǵa qoıý boıynsha naqty múmkindikterdiń jasalǵandyǵy týraly ortaq pikirge keldi. Sondaı-aq, talqylaýdy jalǵastyrý jáne avtokomponentter óndirisiniń otandyq klasterin qurý ıdeıasyn iske asyrý boıynsha naqty qadamdardy aıqyndaý týraly ýaǵdalastyqqa qol jetkizildi.

Aıta ketsek, is-sharany vedomstvonyń Indýstrııalyq damý komıteti, «ALLUR» kompanııalar tobynyń qoldaýymen Ulttyq tehnologııalyq boljaý ortalyǵy jáne Qostanaı oblysynyń ákimdigi uıymdastyrdy. Semınarǵa memlekettik uıymdar men jeke bıznestiń 50-ge jýyq ókili qatysty.