Mańǵystaý jáne Atyraý oblystary avtogazben tolyq qamtamasyz etilgen – Energetıka mınıstrligi
ASTANA. KAZINFORM - Elimizdiń batys óńirlerindegi avtogaz naryǵyndaǵy jaǵdaıǵa qatysty aqparattyq keńistikte taraǵan habarlamalarǵa baılanysty Energetıka mınıstrligi málimdeme jasady.
Mınıstrlik málimetinshe, Mańǵystaý jáne Atyraý oblystaryna suıytylǵan munaı gazyn jetkizý turaqty rejımde jáne óńirlerdiń aı saıynǵy eseptik qajettiliginen joǵary kólemde júzege asyrylyp jatyr.
- Mańǵystaý oblysy boıynsha: oblys ákimdigi málimdegen 18 myń tonna qajettilikke qaramastan, Mınıstrlik maýsym aıyna óńirge 19,5 myń tonna suıytylǵan munaı gazyn bóldi. Budan bólek, suranystyń artýyn óteý maqsatynda «SNPS-Aqtóbemunaıgaz» AQ resýrstarynan qosymsha 1,5 myń tonna gaz bólindi. Atalǵan kólem óńirdegi avtokólikterdi jáne tranzıttik kólikterdi tolyq qamtamasyz etýge jetkilikti. Gazdy tıep-jóneltý kún saıyn jalǵasyp jatyr.
Atyraý oblysy boıynsha: óńirdiń eseptik qajettiligi 9 myń tonna. Atyraý munaı óńdeý zaýytynyń josparly profılaktıkalyq jóndeýge toqtaýyna baılanysty mınıstrlik aldyn ala jetkizý baǵyttaryn qaıta qarap, óńirge rezervtik kólemderdi jóneltti. Nátıjesinde maýsym aıynda Atyraý oblysy 11,6 myń tonnadan astam suıytylǵan munaı gazymen qamtamasyz etildi. Qajettilikten tys bólingen qosymsha kólem (2,5 myń tonnadan astam) AMÓZ jóndeý kezeńinde avtokólik ıeleriniń qajettiligin tolyq óteýge múmkindik beredi, - delingen habarlamada.
Sondaı-aq mınıstrlik jergilikti sıpattaǵy ýaqytsha irkilisterdiń Qarashyǵanaq ken ornyndaǵy gaz óndirý kóleminiń tómendeýimen baılanysty ekeni jóninde taralǵan aqparat shyndyqqa sáıkes kelmeıtinin habarlady. Sonymen qatar ken ornyndaǵy josparly jumystar ishki naryqty janar-jaǵarmaımen qamtamasyz etýge teris áserin tıgizbeıtinin atap ótti. Otandyq tutynýshylar otynmen qalypty jumys rejıminde qamtamasyz etildi.
Atyraýda avtogaz tapshylyǵyna baılanysty janarmaı beketterinde uzyn-sonar kezek paıda bolǵanyn jazǵan edik.
Atyraýda avtogazdy durys bólmedi degen kúdikpen basqarma tergelip jatyr.
