Avtodromda emtıhanaldy daıarlyqtan endi demalys kúnderi de ótýge bolady
ASTANA. QazAqparat - Avtomektepterdiń kýrsanttary endi mamandandyrylǵan HQKO-lardyń avtodromdarynda júrgizý boıynsha emtıhanǵa daıarlyqtan demalys kúnderin qosa kúndelikti óte alatyn bolady.
«HQKO» RMK bas dırektorynyń mindetin atqarýshy Ásemgúl Baltashevanyń aıtýynsha, «bolashaq júrgizýshilerdiń júrgizý boıynsha praktıkalyq emtıhanǵa aıtarlyqtaı daıyn bolýy úshin biz emtıhan aldy daıarlyqtan ótý qyzmetin iske qostyq. Bizge jumys kestesine baılanysty qyzmetti paıdalaný múmkindigi bolmaı júrgen azamattar jıi júginetin. Sol sebepti biz avtodromnyń jumys kestesin qaıta qarastyrdyq».
«Avtomattandyrylǵan elektrondyq alańda praktıkalyq emtıhan tapsyrýǵa emtıhanaldy daıarlyqtan ótý» qyzmetin paıdalaný úshin azamat oqytý kúnine 2 kún qalǵanda mamandandyrylǵan HQKO-ǵa júginýi jáne qyzmet kórsetýge shart jasasýy tıis. Bul rette, onyń ózimen birge jeke kýáligi ǵana bolsa jetkilikti.
Mamandandyrylǵan HQKO-larda emtıhan tapsyrý protsesi búgingi kúni tolyqtaı avtomattandyrylǵanyn eske salamyz. Avtomobılde baqylaý men kólik quralyn basqarý daǵdylaryn baǵalaýdyń elektrondyq júıesi ornatylǵan, ol emtıhannan ótý kezeńderin tirkeıdi jáne avtomatty túrde baǵa beredi. Osylaısha, praktıkalyq emtıhan tapsyrý kezinde adamı faktor tolyqtaı jol berilmeıdi.
Halyqqa qolaıly bolý úshin barlyq mamandandyrylǵan HQKO-larda psıhıatrııalyq jáne narkologııalyq dıspanserlerdiń dárigerleri jumys jasaıdy, al Almatyda aǵymdaǵy jyldyń qazan aıynan bastap shoferlik komıssııa iske qosyldy, ol mamandandyrylǵan HQKO ǵımarattarynda «083Ý» anyqtamasyn alýǵa múmkindik beredi.
Búgingi kúni mamandandyrylǵan HQKO-lar Astana, Almaty, Qaraǵandy Aqtaý jáne Taraz qalalarynda jumys jasap jatqandyǵyn eske salamyz. Jaqyn arada Qazaqstannyń Pavlodar, Taldyqorǵan, Qyzylorda jáne Petropavl qalalarynda osyndaı taǵy da 4 ortalyq ashylatyn bolady.
