Avtobýstyq baǵyttarǵa bılet satý básekelestik ortaǵa berildi
ASTANA. 9 tamyz. QazAqparat - «Qazaqstan Respýblıkasynyń keıbir zańnamalyq aktilerine kólik máseleleri jóninde ózgertýler men tolyqtyrýlar engizý týraly» QR zańynyń óz kúshine enýine baılanysty
otandyq tasymaldaýshylar endigi jerde baǵyttyq avtobýstarǵa bıletti temirjol nemese avıakassalar sekildi agenttik-kassalar, termınaldar men ınternet-resýrstar arqyly satýdy uıymdastyra alady.
Bul týraly QR Kólik jáne kommýnıkatsııa mınıstrliginiń baspasóz qyzmetinen habarlady
Sondaı-aq, zańǵa engizilgen ózgertýler zańdy jáne jeke tulǵalardyń avtobýstyq baǵyttarǵa bılet satýyna quqyq berýimen qatar elektrondyq bılet satýdy damytýǵa da baǵyttalǵan.
Budan basqa, jańa zańda jolaýshylar tasymalyn júzege asyrý barysynda avtobýstardyń qozǵalysyna monıtorıng (dıspetcherlik) júrgizýde zamanaýı telekommýnıkatsııa júıelerin qoldaný mindettelgen. Monıtorıng onlaın - rejıminde navıgatsııalyq jerseriktik júıe arqyly júrgiziledi jáne avtobýstardyń qozǵalysynyń ońtaıly araqashyqtyǵyn anyqtaýǵa múmkindik beredi. Búgingi kúni mundaı monıtorıng júıesi Astana, Almaty qalalary men elimizdiń 9 oblys ortalyǵynda engizilgen. Osy júıeniń kómegimen alynǵan málimetter qalalyq baǵyttyq avtobýstardy bıýdjetten sýbsıdııalaý barysynda eskeriledi.
Taksı tasymaly naryǵyn damytý maqsatynda zańǵa taksı qyzmetiniń ulttyq standarttarǵa sáıkes kelýi týraly tolyqtyrýlar engizilip, áýejaı, vokzal, saýda oryndary, teatr, bazar jáne t.b. oryndardyń mańynda taksı turaǵyn uıymdastyrý jáne jabdyqtaý mindeti jergilikti atqarýshy organdardyń quzyretine berilý arqyly ınfraqurylymdy damytý tetikteri bekitildi.
Avtovokzaldar men avtobeketter joq eldi mekenderde jolaýshylar tasymaly úshin keshendi ınfraqurylymdy damytý úshin jolaýshylarǵa qyzmet kórsetý pýnktterin salý qarastyrylǵan.
Sondaı-aq, sheteldik tasymaldaýshynyń tranzıttik reısten keri qaıtyp bara jatqan jolda Qazaqstannan júkti ózge memleketterge alyp ketýine ruqsat beretin norma zańnan alynyp tastalǵan.
Bul tájirıbe otandyq tasymaldaýshylardyń Qazaqstannan ózge memleketterge júk tasymaldaý naryǵyndaǵy básekege qabilettiligi men júk tasymaly qyzmetiniń naryǵyndaǵy qazaqstandyq mazmunnyń úlesin tómendetip jibergen bolatyn.
