Avtobýstarǵa qatysty talaptar kúsheıtiledi - Jeńis Qasymbek
ASTANA. QazAqparat - Aqtóbedegi jaǵdaıdan keıin turaqsyz jolaýshylar tasymalymen aınalysatyn avtobýstarǵa qatysty talaptar kúsheıtiledi, dep xabarlaıdy QazAqparat tilshisi.
QR Investıtsııalar jáne damý mınıstri Jeńis Qasymbektiń aıtýynsha, ondaı qaıǵyly oqıǵalardyń birneshe sebebi bar. Bastysy - kólik quralynyń eskirýi. "Sosyn adam faktory bar. Avtobýsty paıdalaný erejelerin saqtamaıdy. Osy jaǵdaıǵa baılanysty biz ishki ister organdarymen birlese otyryp, jappaı tekserý sharalaryna kiristik. Sonyń nátıjesinde barlyq xalyqaralyq jolaýshylar tasymalyna qatysty erejelerdi kúsheıtýdi kózdeımiz. Máselen, qazirgi kezde turaqty tasymalǵa qatysty qatań talaptar bar. Kólikti paıdalaný ýaqyty men merzimi, medıtsınalyq jáne texnıkalyq tekseristerden ótý kerek. Aqtóbede janyp ketken avtobýs bolsa, turaqty tasymalmen aınalysqan joq. Sondyqtan búginde fırmanyń basshylyǵyna da, kólik júrgizýshilerine de qoıylatyn suraqtar kóp. Degenmen, tekseristiń nátıjesi boıynsha biz dál osy turaqsyz tasymalǵa qatysty talaptardy kúsheıtýimiz kerek", - dedi J.Qasymbek Úkimet otyrysynan keıingi baspasóz máslıxatynda.
Onyń aıtýynsha, turaqsyz jolaýshylar tasymaly salasyndaǵy qaıǵyly oqıǵalar kórshi Reseı jerinde de bolǵan. "Sońǵy jyldary ondaı tragedııalar bizde ǵana emes, Reseı jerinde de boldy. Bes-alty jyl buryn qyrǵyz mıgranttary mingen avtobýsta da sondaı jaǵdaı boldy", - dep atap kórsetti J.Qasymbek.
