Avtobýstardyń ekologııalyq taza bolýyn talap etemiz - Baqytjan Saǵyntaev
ALMATY. QazAqparat – Almatyda qalalyq máslıhattyń kezekti sessııasy ótip jatyr. Onda 2020-2022 jyldarǵa arnalǵan qala bıýdjeti týraly másele qaraldy, dep habarlaıdy QazAqparat tilshisi.
«Avtobýstardy jyl saıyn satyp alatyn bolamyz. Bizge bir myńnan astam qoǵamdyq kólik qajet. Qazir bir partııasyn satyp aldyq, jeke parkter jańartylyp jatyr. Bıýdjetten sýbsıdııaǵa qomaqty qarjy bólýdemiz. Osyǵan súıene otyryp, avtobýs parkterinen avtobýstardyń ekologııalyq taza bolýyn qamtamasyz etýdi talap etemiz. Bul degenimiz qoǵamdyq kólikter gazben nemese elektr negizinde jumys isteýi kerek», - dedi Almaty qalasynyń ákimi Baqytjan Saǵyntaev máslıhat otyrysynda.
Sonymen qatar, qala basshysy qoldanystaǵy trolleıbýs jelileri jańartylatynyn aıtty.
«Qoldanystaǵy barlyq jelilerdi tolyq modernızatsııalaýdan ótkizemiz. Bizdiń basty maqsatymyz – elektroavtobýstardy iske qosý. Taıaý ýaqytta barlyq elder birtindep elektroavtobýstaryna aýysady», - dedi ol.
