Avtobýstar soqtyǵysýynan jaraqat alǵandardyń jaǵdaıy belgili boldy
ALMATY. QazAqparat - Avtobýstar soqtyǵysynan jaraqat alǵandardyń jaǵdaıy belgili boldy, dep habarlaıdy QazAqparat tilshisi.
Qalalyq densýlyq saqtaý basqarmasy basshysynyń orynbasary Nurjan Isabekovtiń aıtýynsha, jaraqat alǵan 5 adam aýrýhanada jatyr.
«Avtobýstar soqtyǵysqannan keıin barlyǵy 21 adam medıtsınalyq kómekke júgingen. Onyń ishinde 5 adam aýrýhanaǵa jatqyzyldy. Qalǵan adamdar tekserilip, arnaıy nusqaý berilip, úıine jiberildi. Qazir jansaqtaý bóliminde jatqan adam joq. Naýqastardyń jaǵdaıy birqalypty. 3 adam - Jedel medıtsınalyq járdem aýrýhanasynda, 2 adam - ortalyq klınıkalyq aýrýhanada jatyr. 46 jastaǵy er adamǵa ota jasaldy. Іshke tıgen soqqynyń kesirinen ishki qan toqtamaýy degen dıagnoz qoıylǵan bolatyn. Laporaskopııalyq dıagnostıka nátıjesinde uıyǵan qan kólemi az ekendigi anyqtaldy», - dedi ol.
Mamandardyń aıtýynsha, 6 jáne 80 jas aralyǵyndaǵy jolaýshylar negizinen mıy shaıqalyp, aıaq-qoldarynyń jumsaq tinderiniń soqqysymen túsken.
Sonymen qatar, jol apatynan 3 bala jaraqat alǵan.
«6-12 jas aralyǵyndaǵy 3 bala jaraqat aldy. Olardyń barlyǵy ambýlatorııalyq emdeýge úıine jiberildi»,- dedi Nurjan Isabekov.
Aıta ketý kerek, jol apaty 22-shilde kúni Abaı dańǵylynyń boıynda «Qazaqstan» qonaqúıine qarama qarsy tusta bolǵan edi.
Oqıǵa kýəgerleriniń aıtýynsha, avtobýstardyń biri qarsy baǵyttaǵy jolǵa shyǵyp ketken. Nátıjesinde bir-birine betpe-bet kele jatqan avtobýstar soqtyǵysqan.
