Avtobýstar kezegi: Almatyda gaz quıý beketteriniń sany qashan kóbeıedi
ALMATY. KAZINFORM — Almatyda jaz sońyna deıin avtobýstarǵa gaz toltyrý kompressorlyq stantsııalarynyń sanyn 8-den 12-ge deıin kóbeıtý josparlanyp otyr.
Búgin Almaty máslıhatynyń sessııasynda gaz quıý beketterindegi qalalyq avtobýstardyń uzyn-sonar kezekte turýy jáne olardyń jumysyna qatysty másele kóterildi. Depýtattar bul jaǵdaıdyń sebebin túsindirýdi jáne máseleniń qashan sheshiletinin habarlaýdy surady.
Jol qozǵalysyn uıymdastyrý jáne jolaýshylar kóligi basqarmasynyń basshysy Erjan Dıhanbaev kún saıyn qala joldaryna shamamen 3 200 avtobýs shyǵatynyn, onyń 2 myńnan astamy tabıǵı gazpen jumys isteıtinin atap ótti.
Aıtýynsha, qalada jumys istep turǵan stantsııalar táýligine tek 200 myń tekshe metrge jýyq gaz bere alady. Al avtobýs parkteriniń suranysy — 600 myń tekshe metr. Osylaısha, tapshylyq 350 myń tekshe metrge jýyqtap otyr.
— Olardyń úzdiksiz jumys isteýi úshin kún saıyn shamamen 600 myń tekshe metr gaz qajet. Búginde qalada 8 mamandandyrylǵan gaz quıý stantsııasy jumys isteıdi. Degenmen jazǵy ýaqytta gaz qysymy tómendeıdi, sondaı-aq úsh stantsııa jóndeýge ýaqytsha jabyldy. Bul óz kezeginde kezektiń kúsheıýine ákep soqty, — dep túsindirdi ol.
Erjan Dıhanbaev máseleni sheshý úshin Almatyda taǵy tórt mamandandyrylǵan gaz quıý stantsııasy salynyp jatqanyn aıtty. Onyń sózinshe, jańa beketterdiń ekeýi qazirdiń ózinde synaq rejıminde jumys istep tur. Al qalǵan ekeýin jaz sońyna deıin aıaqtaý josparlap otyr.
Sondaı-aq ol qalalyq avtobýstardyń ádettegi avtogazdy emes, arnaıy stantsııalardy talap etetin syǵymdalǵan tabıǵı gazdy paıdalanatynyn basa aıtty. Sol sebepti avtobýstar jeńil kólikterge arnalǵan qarapaıym avtogaz quıý beketterinde janarmaı quıdyra almaıdy.
Talqylaý barysynda depýtat Ákim Tursyn júrgizýshilerdiń eńbek jaǵdaıyna nazar aýdardy. Ol túngi ýaqytty gaz quıý beketterindegi kezekte ótkizip, tańerteń qaıtadan jolǵa shyǵýǵa májbúr bolatyn júrgizýshilerdiń qanshalyqty demalyp úlgeretinin surady. Onyń pikirinshe, júrgizýshiler demalysynyń az bolýy jolaýshylar tasymalynyń qaýipsizdigine keri áserin tıgizýi múmkin.
Erjan Dıhanbaev birqatar avtoparkterde túngi ýaqytta avtobýstarǵa ózderi baryp gaz toltyryp qaıtatyn arnaıy qyzmetkerler bar ekenin aıtty. Eger júrgizýshi gaz quıý protsesine ózi qatyssa, ol kelesi kúni baǵytqa shyqpaıdy.
— Barlyq keste eńbek jáne demalys rejımin eskere otyryp jasalady. Júrgizýshiler aýysymmen jumys isteıdi, sondyqtan qaýipsizdik talaptary saqtalady, — dep sendirdi basqarma basshysy.
Eske salaıyq, buǵan deıin almatylyqtar gaz quıý beketteriniń aldynda uzyn-sonar kezekte turǵan avtobýstardyń beınejazbalaryn jarııalady.
