Avtobýstar apaty: Jansaqtaý bóliminde úsh adam jatyr
NUR-SULTAN. QazAqparat - Elordanyń 2-shi kópbeıindi aýrýxanasynyń bas dárigeri Ivan Lı keshegi jol-kólik apatynda zardap shekkenderdiń jaǵdaıy týraly aıtyp berdi, dep xabarlaıdy QazAqparat tilshisi.
Bas dárigerdiń aıtýynsha, aýrýxanaǵa jetkizilgen bir áıel arqasynan qatty jaraqat aldy. Ony neıroxırýrgııa ortalyǵyna aýystyrýǵa sheshim qabyldandy. Qalǵan adamdarǵa birden kómek kórsetildi.
«Jalpy, keshe bes ota jasaldy. Búginde úsh adamnyń jaǵdaıy aýyr. Biraq kóbisi esin jıdy. Jaǵdaılary turaqty. Sondyqtan olardyń ómirine qaýip tónip turǵan joq dep aıta alamyz. Osylaısha, travmotologııa bólimshesinde 8 adam em-dom alýda. Tarakaldy xırýrgııada eki adam, al jansaqtaý bóliminde úsh adam jatyr», - dedi I.Lı arnaıy baspasóz máslıxatynda.
Onyń sózine qaraǵanda, keshe eń birinshi patsıent tańǵy saǵat 9:40-ta jetkizildi. Al 10:30-ǵa deıin jedel járdem 24 adamdy ákeldi.
«Jalpy, keshegi jol-apatynan keıin bizdiń kómegimizge 29 adam júgindi. Olardyń basym bóligi jedel járdemmen jetkizildi. 14 adam tıisti kómekten keıin úıine jiberildi. Ózgeleri statsıonarda qaldy», - dep atap kórsetti I.Lı.
Aıta keteıik, keshe elordada úlken jol-kólik apaty boldy. Qala mańyna qatynaıtyn júrdek avtobýs qatty jyldamdyqpen baǵdarshamda turǵan avtobýsqa soǵyldy. 301-shi baǵdardyń júrgizýshisi jáne aldyńǵy orynda otyrǵan bir jolaýshy oqıǵa ornynda kóz jumdy.
Soqqy alǵan avtobýs jedel medıtsınalyq járdem kóligi men alda turǵan taǵy bir avtobýsqa soǵyldy.
Atalǵan jol-kólik apatynda zardap shekkenderdiń sany 36 adamǵa jetti.
Astana LRT basshysy Bekmyrza Igenberdınovtyń aıtýynsha, elordadaǵy jol apatynan zardap shekkenderge ótemaqy tólenedi.
